आमा

टंकप्रसाद पन्थ
त्रिभुवन बहुमुखी क्याम्पस, तानसेन, पाल्पा

आमा शब्द छ मर्ममा अमर यो लौकिक संसारको
आमा नै नभए समग्र गति यो चल्दैन संसारको
आमा सागर हुन् अनन्त गहिरो पुग्नै त्यहाँ सक्छ को ?
आमा निश्छल सार तत्व जननी स्रष्टा स्वयं सत्य हो ।।

आमा बादल हुन् भरेर जलको वर्षा उनै गर्दछिन्
आमा आगत हुन् सुरम्य सुखका प्याला उनै भर्दछिन्
आमा गौरव हुन् अनन्त युगका आदर्श जन्मिाउँछिन्
आमा सौरभ हुन् अखण्ड मनमा माधुर्य वर्षाउँछिन् ।।

आमा पर्वत हुन् अजस्र जलका धाराहरू बग्दछन्
आमा पुस्तक हुन् खुला जगतकी ज्ञाताहरू पढ्दछन्
आमाको ममता अगाध छ यहाँ नापेर नापिन्न त्यो
आमा सर्जक हुन् समस्त जगकी मासेर मासिन्न त्यो ।।

आमा साधक हुन् पर्वाह नगरी वात्सल्य वर्षाउँछिन्
निष्ठासाथ खटेर चिन्तित बनी सन्तान हुर्काउँछिन्
माता शक्ति प्रचण्ड यो छ जगमा आमा स्वयं सार हुन्
हाम्रो सृष्टि छटा समुन्नति दिने आमा कलाकार हुन् ।।

आधा पेट भरेर आँत बलियो ऊर्जा बढाईकन
खट्छिन् साथ सदैव स्वार्थ नलिई सन्तानकै त्यागमा
आमातुल्य मनुष्यमा भन कुनै नाता यहाँ के छ र ?
आमातुल्य यहाँ बुझौँ समझले माया कहाँ के छ र ?

आमा साथ कुनै रहन्छ सुखले त्यो स्वर्गको सान हो
आमा भिन्न हुँदा नुहिन्छ शिर यो बल्झिन्छ यो प्राणको
आमा स्वर्ग भुलाउँछिन् र त यहाँ फैलिन्छ यो जीवन
आमा हुन् बलवान यो जगतकी धर्ती सिँगार्छिन् घना ।।

आमा सृष्टि बचाउँछिन् र त यहाँ रम्छन् सबै मानव
आमा भार उठाउँछिन् र त यहाँ उठ्छन् कला वैभव
धर्ती हुन् जननी सबै किसिमका बाधाव्यथा थेग्दछिन्
आमा मात्र उदार छिन् सकसको यो ताडना खेप्दछिन् ।।

आमा दर्शनशास्त्र हुन् जगतकी सिद्धान्त जन्माउँछिन्
आमा सिर्जन पात्र हुन् सकलकी सौन्दर्य जन्मिाउँछिन्
आमा स्वर्ग समान छिन् अमृतका प्यालाहरू भर्दछिन्
आमा पूज्य सदैव यो जगतको आदर्शमा बाँच्दछिन् ।।

आमाभित्र अगाध मर्म छ यहाँ जन्मेर आफू बुझ
आमाको छ प्रगाढ मातृममता बाँच्नेहरूले बुझ
धर्ती उर्वर बन्नुमा त जननी अस्तित्वको भाव छ
आमा राष्ट्र समान छन् नयनमा नेपालको सार छ ।।
२०७३ बैशाख १५