तानसेन । पाल्पा र स्याङजाको सीमाना राम्दीमा नयाँ पक्की पुल निर्माण हुने भएको छ ।
सिद्धार्थ राजमार्गको पाल्पा र स्याङजाको सीमाना राम्दीमा कालीगण्डकी नदीमाथि बनाइएको पुल जीर्णभएपछि नेपाल सरकारले आर्थिक वर्ष २०७८्\०७९ को बजेट तथा कार्यक्रममा पुल निर्माणका लागि डिजाइन, स्टमेट र नक्सा तयार पार्न ३० लाख रुपैँया बजेट विनियोजन गरेको छ । पुल योजना पश्चिम क्षेत्र सेक्टर नं. ४ का प्रमुख भीमार्जुन कडेंलले राम्दी पुलको डिजाइन स्टमेट गर्न आगामी आर्थिक वर्षका लागि ३० लाख बजेट विनियोजन भएको बताउनुभयो ।
कालीगण्डकी नदी माथिको पक्की पुल जीर्ण भएपछि ठूला र हेभी सवारी साधन ओहोरदोहोर गर्न समेत समस्या भएको थियो । राम्दी पुलमा जोखिम देखेपछि पाल्पा र स्याङ्जाका जिल्ला प्रशासन कार्यालयले तीन वर्ष अगाडि देखि ठूला र हेभी सवारी साधन ओहोरदोहोर गर्न रोक लगाएका थिए । राम्दीमा १५ टनभन्दा बढी क्षमता भएका र हेभी गाडीहरुलाई आउजाउ गर्न रोकिएको छ ।
