तानसेन । पाल्पाको तेस्रो जिल्ला सभाले कोभिड १९ का कारण सञ्चालित आयोजनाको काम प्रभावित भएकाले म्याद थप गरिदिन सम्बन्धित निकायलाई अनुरोध गरेको गरेको छ ।
जिल्ला सभाले आ.व. २०७६।०७७ का लागि विनियोजित बजेट ठेक्का तथा उपभोक्तामार्फत सञ्चालित योजना कोभिड १९ का कारण तोकिएको समयमा सम्पन्न हुन नसक्ने अवस्था रहेकाले म्याद थप गरी क्रमागत योजनाको रुपमा स्वीकृति दिन अनुरोध गर्ने निर्णय गरेको हो । जिल्ला सभाले पाल्पा जिल्लामा कोरोना परीक्षणका लागि पिसिआर मेशिन स्थापना र सञ्चालन गर्न संघ र प्रदेश सरकारलाई अनुरोध गर्नेसमेत निर्णय गरेको छ ।
जिल्ला समन्वय समिति पाल्पाका कार्यवहाक प्रमुख मिरा मरासिनीको अध्यक्षतामा बसेको तानसेनमा बसेको तेस्रो जिल्लासभाले आन्तरिक श्रोतबाट संकलित र संघ र प्रदेशबाट प्राप्त कार्यक्रमको रकम बाँडफाँड गरेको छ । संघीय मामिला तथा सामान्य प्रशासन मन्त्रालयबाट प्राप्त १ करोड २७ लाख ६४ हजार, स्थानीय पूर्वाधार विकास साझेदारी कार्यक्रम १० लाख ८० हजार, गरिव घरपरिवार पहिचान तथा परिचयपत्र वितरण कार्यक्रम १५ लाख ४० हजार, गरिवसँग विशेश्वर २ लाख ९९ हजार, मुख्यमन्त्री ग्रामिण विकास कार्यक्रम २ लाख ५० हजार, पर्यटन प्रबद्र्धन कार्यक्रम २ लाख र कोभिड १९ अनुगमन र व्यवस्थापन कार्यक्रम ५ लाखसहित १ करोड ६६ लाख ३३ हजार रुपैँया बाँडफाँड गरिएको जिल्ला समन्वय अधिकारी लेखनाथ ज्ञवालीले बताउनुभयो ।
यसैगरी जिल्ला विकास समिति हुँदै रहेको करिव १२ करोड आन्तरिक कोषलाई आगामी वर्ष आन्तरिक कोष सञ्चालन निर्देशिका वमोजिम बाँडफाँड गर्ने सभाले निर्णय गरेको छ । जिल्ला समन्वय समितिको भवन नभएकाले जग्गाको प्रबन्ध गरी भवन बनाउने यस अगाडिका निर्णय अहिलेसम्म कार्यान्वयन हुन सकेको छैन । कर्मचारीको कल्याण कोष भुक्तानीलगायतका कार्यक्रमका लागि आवश्यक बजेट घटाउँदा करिव ७ करोड रकम बाँडफाँड गर्न मिल्ने जिल्ला समन्वय अधिकारी ज्ञवालीको भनाई छ ।
गत वर्षको निर्णय दोहो¥याउँदै पाल्पामा तरकारीको सुपरजोन, अदुवा र सुन्तलाको जोन कार्यक्रम बिस्तार गर्न जिल्लासभाले माग गरेको छ । विगतका वर्षहरुका १२ करोड ८१ लाख १२ हजार ३ सय ९६ रुपैंयाको आन्तरिक कोष स्वीकृत गरी बेरुजु संपरीक्षणका लागि सम्बन्धित तहमा पठाउने, संघ र प्रदेश सरकारबाट सञ्चालन गर्नुपर्ने योजनाहरु पनि सम्बन्धित निकायमा सूचीसहित पठाउने जिल्लासभाले निर्णय गरेको छ ।
