पाल्पा । लकडाउनको आज नवौ दिन पाल्पा जिल्लामा स्थापना गरिएका २७ क्वारेन्टाइनमध्ये ४ वटामा ३७ व्यक्ति आइसोलेसनमा बसेका छन् ।
पूर्वखोलाको जनमार्ग मावि सिलुवामा २१, रामपुरको बालकल्याण प्राविमा ११, रैनादेवीछहराको जोगवाणी प्राविमा ४ र छहरा पुरानो स्वास्थ्यचौकी भवनमा १ जना गरी ३७ जना व्यक्ति क्वारेन्टाइनमा बसेका छन् । कोरोना भाइरस एक व्यक्तिबाट अर्को व्यक्तिमा सजिलै सर्ने भएकाले स्थानीय तहहरुले क्वारेन्टाइनको व्यवस्था गरेका हुन् । क्वारेन्टाइनमा बसेका अधिकांश व्यक्ति भारतबाट गड्डाचौकी भएर नेपाल आएका नागरिकहरु रहेका छन् ।
जनमार्ग माध्यमिक विद्यालय क्वारेन्टाइनमा वडाअध्यक्ष भोगबहादुर थापा, विद्यालय व्यवस्थापन समितिका अध्यक्ष र स्वास्थ्यकर्मी व्यवस्थापनमा नियमित खटिएका छन् । आइसोलेसनमा बस्नेहरुका लागि विहान साँझ दाल, भात, तरकारी, अण्डा दिने गरिएको छ । क्वारेन्टाइनमा टेलिभिजन र वाइफाइ जोडिएको छ । व्यक्ति पिच्छे डिजिटल थर्मामिटर दिएको र साँझ विहान तापक्रम लिएर गाउँपालिकाको कार्यालयमा रिपोर्टिङ गर्ने गरिएको बताउनुभयो । पूर्वखोलाले उद्बुद्ध मावि र बीरकोट माविमा बनाएको क्वारेन्टाइनमा मेडिकल बेड नै राखिएको छ । पूर्वखोला गाउँपालिकाका स्वास्थ्य शाखा प्रमुख मोहनप्रसाद ढकालले आइसोलेसनको बसाईलाई पट्यारलाग्दो नहोस् भनेर गाउँपालिकाका अध्यक्ष आफै सोध्दै हिंड्नुभएको र आवश्यक व्यवस्था गरेको बताउनुभयो ।
शंकास्पद व्यक्ति र विदेशबाट आएका मानिस जो आफै भयभित र त्रसित छन्, उनीलाई राख्ने क्वारेन्टाइन मापदण्ड वमोजिम मात्र होइन, सामान्य लोकलाज ढाक्ने अवस्थाका समेत छैनन् । भुईमा पिपि फर्म बिछ्याएर बनाएको रामपुर नगरपालिकाले मिडियाको दवावपछि क्यारेन्टाइनमा खाट थपेको छ । गर्मीमा लाग्ने लामखुट्टेबाट बच्च झुल दिएको छ । क्वारेन्टाइनमा बस्ने नागरिकका लागि समय बिताउने कुनै साधन छैन । भारतको बम्बईबाट छोरा लिएर आएका एक नागरिकले साथमा रहेको मोवाइल पनि बेचेर बाटो खर्च गरेका छन् । आमा गुमाएका ४÷५ वर्षको बच्चाले कार्टुन हेर्ने मोवाइल बाटोमा यात्रा गर्दा बाबुले बेचेपछि क्वारेन्टाइनमा बसेका बच्चा छटपटिरहेका छन् । रामपुर नगरपालिकाका प्रमुख रमणबहादुर थापाले विदेशबाट फर्किनेलाई एयरपोर्ट र सीमा नाकाबाटै सिधै क्वारेन्टाइनमा नपठाएर सबैलाइ दुःख भएको बताउनुभयो ।
रम्भा गाउँपालिकाले ताहूँमा बनाएको क्वारेन्टाइन व्यवस्थित छैन । तर ताहूँ प्राथमिक स्वास्थ्य केन्द्रका चिकित्सक र स्वास्थ्यकर्मीले जोखिम मोलेरै ज्वरोका विरामीको स्वास्थ्य जाँच गरेका छन् । सामान्य थर्मामिटर पनि पर्याप्त नभएपछि एकपछि अर्को व्यक्तिको ज्वरो नाप्दा स्प्रिटले पुछेर दिने गरिएको मेडिकल अधिकृत केशरसिंह कार्कीले बताउनुभयो ।
नागरिकको सुरक्षा र सुविधा दिन गठन भएका स्थानीय सरकारहरुले विदेशबाट अत्यन्त दुःखका साथ घर फर्किएका नागरिकको मानवअधिकारको सम्मान गर्दै सम्मानजनक व्यवहार गर्नुपर्ने सुझाव उनीहरुका परिवारजनको रहेको छ ।
