तानसेन । निजी तथा आवासिय विद्यालय अर्गनाइजेसन प्याव्सनले तानसेन नगरपालिकाले शैक्षिक शत्र २०७७ का लागि निर्धारण गरेको शुल्कप्रति आपत्ति प्रकट गरेको छ ।
प्याव्सनका पदाधिकारी र निजी विद्यालयका सञ्चालकहरुले आज तानसेन नगरपालिकाका प्रमुख अशोककुमार शाहीलाई भेटेर तोकिएको शुल्क सच्याउन ध्यानाकर्षण गराएका हुन् । प्याब्सनका नगर समितिका अध्यक्ष दुर्गाप्रसाद बस्यालले अभिभावकसँगको सहमतिमा ५० प्रतिशत र असोज महिनाको मासिक शुल्कमा ७५ प्रतिशत लिन सक्ने निर्देशनप्रति असहमति रहेको बताउनुभयो । नगरपालिकाको त्यो निर्णयले निजी विद्यालयका शिक्षक, कर्मचारी र विद्यार्थीको भविष्य अनिश्चित बनेको बताउनुभयो । प्याव्सनका नगर अध्यक्ष बस्यालले साउन भदौमा सञ्चालित वैकल्पिक सिकाईको ७५ प्रतिशत र असोजदेखि शतप्रतिशत लिन पाउनुपर्ने माग रहेको बताउनुभयो ।
तानसेन नगरपालिकाले शैक्षिक शत्र २०७६ कै शुल्क कायम गरी बैशाख र जेठ महिनाको शुल्क नलिन र अरु शुल्क आधा मात्र उठाउन निर्देशन दिएको छ । तानसेन नगरकार्यपालिकाको बैठकले वार्षिक शुल्कको आधा, असार, साउन र भदौ महिनामा सञ्चालित वैकल्पिक सिकाई क्रियाकलाप वापत मासिक शुल्कको ५० प्रतिशत र असोजदेखि अभिभावकको सहमतिमा ७५ प्रतिशत लिने व्यवस्था गरेको छ । कार्यपालिकाले यातायात, कम्यूटर, अतिरिक्त क्रियाकलाप, विज्ञान प्रयोगशाला र पुस्तकालयलगायतका शुल्क विद्यालय विद्यार्थी उपस्थित नभएसम्म लिन नपाइने निर्णय गरेको छ ।
सरकारले कोभिड १९ को परिस्थितिलाई मध्यनजर गरी जारी गरेको विद्यालय सिकाइ सहजीकरण निर्देशिका २०७७ मा स्थानीय तहले स्वीकृत गरे वमोजिम शुल्क लिन पाउने व्यवस्था गरेको छ । सरकारले कोरोना संक्रमण नियन्त्रण गर्न विद्यालय सञ्चालनमा रोक लगाएको छ । विद्यालय बन्द हुँदा पठनपाठन र विद्यार्थीको सिकाई प्रक्रियामा ठूलो असर परेको छ । सरकारी र सामुदायिक विद्यालयका शिक्षकहरुले असोजसहित दशैं भत्ता बुझिरहँदा निजी विद्यालयका शिक्षकहरुले असारसम्मको तलव पनि पाएका छैनन् ।
