तानसेन । पाल्पा जिल्लाकाे सदरमुकाम रहेकाे तानसेन नगरपालिकाले तानसेन ५ शिवपोखरीका २१ घरमा बाख्रा वितरण गरेको छ ।
मुख्यमन्त्री ग्रामिण विकास तथा युवा स्वरोजगार कार्यक्रमबाट समुदायलाई बाख्रा वितरण गरिएको हो । कोभिड १९ को कहरमा उच्च स्वास्थ्य सतर्कता अपनाएर घरटोलमै पुगेर नागरिकलाई बाख्राका पाठी वितरण गरिएको नगर प्रमुख अशोक कुमार शाहीले बताउनुभयाे । नगरपालिकाले पशुपालनबाट महिलालाई आत्मनिर्भर र स्वावलम्बी बनाउन बीउका रुपमा बाख्रा वितरण गरेको छ। नगर प्रमुख शाहीले प्राप्त गरेको बीउ बाख्राले व्यवसायीक रुपमा पशुपालन गर्न उत्साह थप्ने विश्वास व्यक्त गर्नुभयाे ।
कार्यक्रममा नगर उपप्रमुख लक्ष्मीदेवी पाठकले सधै दैलाेकुचोमा सीमित महिलालाई आर्थिक आयआर्जनको बाटो देखाउन बाख्रा वितरण गरिएको बताउनुभयाे । उहाँले नगरपालिकाले सवै क्षेत्रमा रहेका महिलाको आर्थिक,सामाजिक विकासका लागि मागमा आधारित कार्यक्रम संचालन गरेको समेत बताउनुभयाे । बाख्रापालनका लागि आबश्यक पर्ने प्राविधिक र औषधी सहयोग नगरपालिकाले उपलव्ध गराउने भन्दै बाख्रापालनबाट लाभ लिन उहाँले आग्रह गर्नुभयाे ।
मुख्यमन्त्री ग्रामिण विकास तथा युवा स्वरोजगार कार्यक्रम अन्तरगत यस वडामा २८ घरलाई २ वटा पाठी वितराण गर्ने योजना अनुसार पहिलो चरणमा २१ घरलाई ४२ वटा बाख्रा वितरण गरिएको निर्देशक समितिका सदस्य गुराँस आत्रेयले बताउनुभयाे । उहाँका अनुसार बाँकी ७ घरलाई केहि दिनमै बाख्रा उपलव्ध गराइनेछ । शिवपाेखरीका १० घर परिवारका लागि खोर निर्माणको कार्यक्रमसमेत चलेको छ । खोर निर्माण गर्नका लागि दश हजार नगरपालिकाले दिने छ । नगरपालिकाले बाख्राका लागि आबश्यक घाँसको विउ र अन्य सहयोग नगरपालिकाबाट लिन सकिने वडाध्यक्ष रामबहादुर रावलले बताउनुभयाे ।
