दाेभान । तिनाउ गाउँपालिकाको आठौं गाउँसभा सम्पन्न भएको छ ।
गाउँसभाले तीन वटा कार्यविधि र गाउँपालिकाकाे बजेट समेटिएकाे विधेयक पारित गरेकाे हो । लैंगिक निवारण कोष कार्यविधि २०७७, जलश्रोत उपयोग तथा मुहान दर्ता सम्बन्धी कार्यविधि, २०७७ र संक्षिप्त वातावरणीय अध्ययन तथा प्रारम्भिक वातावरणीय परीक्षण कार्यविधि, २०७७ पारित भएको गाउँपालिका अध्यक्ष ओमबहादुर घर्तीमगरले बताउनुभयाे । सभामा चालु आर्थिक वर्षको कार्यप्रगति, समसामयिक विषयमा छलफलसहित ३५ लाख १५ हजार पुरक बजेट थप गरिएको प्रमुख प्रशासकीय अधिकृत सुन्दरप्रसाद श्रेष्ठले जानकारी दिनुभयो ।
प्रमुख प्रशासकीय अधिकृत श्रेष्ठका अनुसार तिनाउ गाउँपालिकामा चालु आर्थिक वर्षका २५० योजनामा १२५ योजना सम्झौता भइसकेका छन् । जसमध्ये ३५ योजना सम्पन्न भइसकेका छन् । पालिकामा चालु आर्थिक वर्षमा ३३ प्रतिशत चालु खर्च र १८ प्रतिशत पूँजीगत खर्च भएको छ । गाउँपालिकामा यसै वर्षभित्र सम्पन्न गर्ने गरी प्रशासकीय भवन निर्माण कार्य जारी रहेको छ । सूचना प्रविधि अधिकृत तुलबहादुर घर्तीमगरका अनुसार वडा नं. ५ र ४ का वडा भवनसमेत निर्माण भएका छन् ।
तिनाउँ गाउँपालिका साविकका कचल, दोभान, कोलडाडाँ र मस्याम गाविस मिलाएर ६ वडामा विभाजन गरि बनेको गाउँपालिका हो । हरियाली बनजंगल, जन्तीलुंग, रिङसिङलेक, पाटन, ठुली उदाङ, हात्तिलेक, सत्यवतीताल, सुकेताल, जितगढी, नुवाकोट सिद्धबाबा मन्दिरजस्ता ठाउँ तिनाउँका धार्मिक तथा पर्यटकीय सम्भावना बोकेका क्षेत्र हुन् ।
