डुम्रे । सिद्धार्थ राजमार्गको बुटवल तानसेन सडक खण्डअन्तर्गत गौडे पुल नजिकै खसेको पहिरोका कारण आज तेस्रो दिनसम्म पनि सडक अबरुद्ध रहेको छ ।
तानसेन नगरपालिका ८ गौडेपुल नजिकै अस्ती राती खसेको पहिरो हटाउन नसक्दा सडक लगातार अवरुद्ध भएको हो । सडकमा करिव २ सय मिटरमाथिबाट ढुंगा र गिट्टीसहितको पहिरो खसिरहेको छ । प्रमुख जिल्ला अधिकारी रमेश न्यौपानेले अवरुद्ध सडकको अवस्था अवलोकन गरी पहिरो पन्छाउने कार्यलाई तिव्रता दिन अनुरोध गर्नुभयो ।
हिजो दिनभर दुई वटा एक्साभेटर प्रयोग गरेर पहिरो पन्छाउने काम गरेको र काम नसकिएको प्रहरी उपरीक्षक दीपक खरेलले बताउनुभयो । सडकको ६० मिटर क्षेत्रमा झरेको पहिरोको ५० प्रतिशत पन्छाएर सकिएको र आज वर्षा नभए साँझसम्म सडक खुल्ने जिल्ला प्रहरी कार्यालय पाल्पाले जनाएको छ । तानसेनतिरबाट गएका सवारी साधन डुम्रे र गौडेपुल नजिक रोकिएका छन् ।
तिनाउ गाउँपालिकाको दोभान बजार नजिक आज ठूल्ठूला ढुंगासहित पहिरो खसेको छ । एक हप्तादेखि खसिरहेको पहिरो अस्ती ठूलो मात्रामा खसेपछि पहिरोले लु १ क ११७५ नम्बरको ट्रकसमेत पुरिएको थियो । सडक अवरुद्ध हुँदा बुटवलबाट पाल्पा हुँदै गुल्मी, अर्घाखाँची, स्याङ्जा जाने र बुटवलतिर जाने गाडी रोकिएका छन् । मोटरसाइकिल भने वैकल्पिक मार्ग प्रयोग गरेर हिडेका छन् ।
