बोली । कार्तिक २८ – पाल्पा जिल्लामा परम्परागत प्रविधिको सट्टा आधुनिक उपकरण र प्रविधिले किसानलाई खेतीपातीमा सुविधा दिन थालेका छन् ।
हिउँदे
बाली भित्र्याउने मुख्य माँचो हुने मंसिर नलाग्दै किसानहरुले थ्रेसर र
ट्याक्टरको प्रयोग गरेर धान पराल घर ल्याइरहेका छन् । माडीफाँटको आधाभन्दा
धेरै खेतको धान पराल किसानहरुले स्याहारिसकेका छन् । धान काट्ने, पाँजो
लाउने, बिटा उठाउने, दाइँ गर्ने र धान पराल बोक्ने काममा महिनौं दिन लगाउने
किसानहरु अहिले २\४ दिनको अन्तरालमै खेती स्याहार्ने गरेका छन् ।
धान
काट्ने पाँजा लगाउने एकदिन, बिटा बाँध्ने, धान झार्ने र खरै लगाउने एक दिन
र दाइँ गर्ने एक दिन गरी ३\४ दिन लगाउनुपर्ने काम थ्रेसरले एकै दिनमा
झारेको छ । धान पराल बोक्ने काम ट्याक्टरले लिएकाले किसानको श्रम, समय र
पैसा बचत भएको छ । ८\१० जना खेतालाको दिनभरको मेलो थ्रेसरले एकै घण्टामा
सक्दिने भएकाले पनि धेरैले थ्रेसरबाट धान झाँट्ने गर्न थालेको तानसेन ९ का
कृषक लीलाप्रसाद बस्यालले बताउनुभयो । आधुनिक प्रविधिका कारण कम जनशक्तिले
पनि खेती गर्न सकिने र थोरै समयमा धेरै काम लिन सकिने स्थिति भएको उहाँको
भनाई छ ।
दमकडा,
सराई, टिन्टीआँप, कुन्सरे, दोहोरा, लालपाटी, बुढीकोट, पिप्ले टोलैपिच्छे
ट्याक्टर र थ्रेसर पाइन थालेपछि किसानहरुलाई धेरैनै सुविधा भएको छ ।
माडीफाँटमा रहेका करिव १० वटा थ्रेसरले दाइँ गरेको दृष्य हेर्नलायक हुने
गरेको छ । डबल फिल्टरवाला थ्रेसरले धान ओसाउनै नपर्ने, पराल तान्न र सोहर्न
नपर्ने हुँदा पनि आफूहरुलाई काम भ्याइनभ्याई भएको थ्रेसर सञ्चालक विष्णु
पाण्डेय सटुकेलीले बताउनुभयो । एउटा थ्रेसरले एक घण्टामा ४०\४५ मुरी धान
झाँट्ने र पराल माड्ने गर्दछ ।
माडीफाँटको
सरम्जालगायतका गैरीखेतहरुको धानपराल स्याहारेर सकिएको छ भने टारी खेतको
धान पनि भित्र्याउने लहर चलिरहेको छ । माडीफाँटसँगै रामपुर, अर्गली, हुँगी,
कचल, झडेवा, सर्देवा, पूर्वखोला र गल्धा फाँटहरुमा पनि थ्रेसर र
ट्याक्टरको प्रयोग गरी धान भित्र्याउने काम भइरहेको छ । मियो गाडेर दाइँ
गर्ने परम्परा हट्दै गएको छ । विगतमा फाँटमा घोल्की बनाएर धान पराल कुर्ने र
मंसिरभरि धान पराल बोक्ने युग पार गरेकाहरु कृषि प्रविधिले ल्याएको यो
सुविधा देखेर छक्क परेका छन् ।
