तानसेन । बाँसटारी झडेवा मोटरबाटोअन्तर्गतको पक्लुहवादेखि अम्लिहानसम्मको सडक समयमा कालोपत्रेको काम सुरु नहुँदा स्थानीय जनता आक्रोसित भएका छन् ।
अघिल्लो आर्थिक वर्षमा सम्झौता भएको यो आयोजना चालु वर्षको तीन महिना बितिसक्दा काम सुरु हुन नसकेपछि स्थानीय बासिन्दा आक्रोसित भएका हुन् । संगमचोक, तिन्टीआँप, अर्खले, दमकडा, अम्लिहान क्षेत्रमा सडक भत्किएर दूरावस्थामा पुगेको छ । तानसेन नगरपालिका ७ पक्लुहवादेखि वडा नं ९ को अम्लिहानसम्म सडकको अवस्था बेहाल रहेको चालक शिवप्रसाद बस्यालले बताउनुभयो । उहाँले भन्नुभयो, ‘बजेट विनियोजन भयो भनेर सुनेको पनि एक वर्ष भयो, अहिलेसम्म कुनै सुरसार छैन ।’
तानसेन नगरपालिकाले पक्लुहवा अम्लिहान खण्डको तीन किलोमिटर सडक कालोपत्रे गर्न गत जेठ २१ गते श्री जयनेपाल इश्वर विवेक एण्ड कुबेर जेभी स्याङजासँग सम्झौता गरेको थियो । निर्माण व्यवसायीले आफूले काम नगरेर अरुलाई पेटी ठेक्का दिन खोजेको भन्दै स्थानीय बासिन्दाले गुनासो गरेका छन् । नगरपालिकाका इन्जिनियर रामप्रसाद श्रेष्ठले लकडाउन सकिएकाले तत्काल काम सुरु गर्न निर्माण व्यवसायीलाई ताकेता गरिएको बताउनुभयो ।
माडी चक्रपथको सडक बिस्तार र सडक बोर्डले मर्मत गर्न ओटासिल उक्काएपछि पक्लुहवा अम्लिहान खण्डमा खाल्डाखुल्डी पर्न थालेको हो । दुबै आयोजनाले काम नगरेपछि बाटो जीर्ण भएकाले नगरपालिकाले समपुरक बजेटबाट ठेक्का लगाएको तानसेन ९ का वडाअध्यक्ष हरिसुमर रेग्मीले बताउनुभयो । जिल्ला सदरमुकाम जोड्ने सडकमध्ये बाँसटारी झडेवा सडक आर्थिक सामाजिक महत्व बोकेको सडक हो ।
विगत तीन वर्षदेखि बाँसटारी अम्लिहानसम्मको सडक खाल्डाखुल्डी र हिलाम्य हुन थालेको छ । सडकको अवस्था बिग्रिएकाले दैनिक यात्रा गर्ने सयौं यात्रुले सास्ती बेहोर्नु परेको छ । वर्षाका बेला पानी जमेर हिलाम्य हुने र हिउँदमा धुलो उठेर वरिपरि बस्नै नहुने अवस्था भएको छ । साना ठूला सवारी साधनको पट्टा भाँचिने, गाडी लच्किएर ठोक्किने गरेको यातायात व्यवसायीको भनाई छ ।
तानसेन नगरपालिकाका प्रमुख अशोककुमार शाहीले ठेक्काको काम समयमा सुरु नहुने, तोकिएको म्यादमा नसकिने कारणले जनता पटकपटक कार्यालयमा डेलिगेसन आएकाले यस विषयमा निर्माण व्यवसायी बोलाएर गम्भीरतापूर्वक छलफल गर्ने जानकारी दिनुभयो । नगरपालिकाले विभिन्न समयमा ठेक्का लगाएका एक अर्वभन्दा बढीको योजनाहरु काम सुरु नभएर अलपत्र परेका छन् । बाँसटारी पक्लुहवा र अम्लिहान सराई खण्डको अवस्था पनि बेहाल छ ।
