पाल्पा । तिनाउ गाउँपालिकाको दोभान बजार नजिकै भासिकको सडक मर्मत गरी केहीबेरमा एकतर्फी रुपमा सञ्चालन हुने भएको छ ।
प्रमुख जिल्ला अधिकारी रमेश न्यौपानेसहितको टोलीले आज बिहान तानसेनदेखि सिद्धबाबासम्मको स्थलगत अनुगमन गरी सडक तत्काल मर्मत गर्न निर्देशन दिएको हो । सडक कार्यालयका इन्जिनियर शिव खत्रीले ठूला र लोड गाडी ट्रायल गरेर चलाएपछि अरु सबै गाडीहरु सञ्चालन गर्न दिने बताउनुभयो ।
प्रमुख जिल्ला अधिकारी न्यौपानेले तानसेन बुटवल सडक खण्डको ४ स्थानमा पहिरो र ३ स्थानमा सडक भासिएको अवस्था देखिएको बताउनुभयो । पहिरो पन्छाउने र भासिएको स्थानमा सडक सुधार गरी तत्काल एकतर्फी रुपमा भए पनि ठूला सवारी साधन सञ्चालन ल्याउने तयारी भएको छ । स्थलगत अनुगमन टोलीमा प्रहरी उपरीक्षक दिपकराज खरेल र सडक डिभिजन कार्यालयका इन्जिनियर शिवु खत्रीलगायत हुनुहुन्थ्यो ।
केही दिनदेखि परेको अविरल वर्षाका कारण सिद्धार्थ राजमार्गको दोभान बजार नजिक सडक भासिएपछि ठूला गाडी सञ्चालनमा अवरोध भएको छ । सडक तिनाउ खोलाको किनारपट्टी करिव ३० मिटर भासिएको छ । झुम्सा, चौविस माइल क्षेत्रमा पनि सडक भासिएको छ ।
कालोपत्रे सडकमा प्वाल र चर्चरी चिरा परेपछि जिल्ला प्रशासन कार्यालयले ठूला सवारी साधन सञ्चालनमा रोक लगाएको हो । साना गाडीहरु भने नियमित चलिरहेका छन् । गुल्मी, अर्घाखाँची, स्याङजा, बाग्लुङ, पर्वत र कास्की जाने आउने मालबहाक गाडीहरु हिजोदेखि सडकमा रोकिएका छन् ।
