माया बस्याल –
चैत २५ – लकडाउनका कारण दैनिक ज्यालादारी गरेर गुजारा चलाउने माथागढी ३ कसेनी भैसिकट्टाकी ६६ बर्षिय बिष्णु कुमारी रानालाई छाक टार्न मुस्किल पर्यो ।
कोरोना भाईरस संक्रमण कम गर्न सरकारले लकडाउन गरेपछी रानाको रोजीरोटी पनी बन्द भयो । दैनिक काम गर्ने र त्यही पैसाले साँझ छाक टार्ने रानाको घरमा चुलो बल्न बन्द भयो । त्यसै समयमा स्थानिय तहले राहत स्वरुप खाद्यान्न, दाल, तेल, नुनलगाएतका सामग्री बाँडेपछी रानालाई छाक टार्न सहज भयो ।
राना जस्तै घरमा चुलो बल्न छाडेका १ सय १७ घरपरिवारलाई माथागढी गाउँपालिका वडा नं. ३ ले राहत वितरण गरेको छ । माथागढी गाउँपालिकाको सहयोग, वडा कार्यालयको समन्वय र सराइ युवा क्लबले व्यवस्थापन गर्दै विपन्न परिवारलाई राहत वितरण गरेको हो । गाउँपालिकाले पारिवारिक संख्या अनुसार २ जना सम्म सदस्य भएका परिवारलाई १५ किलो चामल, १ किलो नुन, १ किलो दाल, १ लिटर तेल राहत वितरण गरेको छ ।
त्यस्तै २ जना भन्दा माथि सदस्य हुने परिवारलाई २५ किलो चामल, २ किलो नुन, २ किलो दाल र २ लिटर तेल वितरण गरेको छ । वडाध्यक्ष दिपक थापाका अनुसार सराई युवा क्लबको सहयोगमा ८६ सहित जम्मा २०३ विपन्न परिवारलाई राहत वितरण गरिएको छ ।
