झडेवा । कृषि ज्ञान केन्द्र पाल्पाले माथागढी गाउँपालिकामा स्मार्ट कृषि गाउँ कार्यक्रम सञ्चालन सम्बन्धी अन्तक्र्रिया तथा छलफल गरेको छ ।
परम्परागत तरिकाले मौरीपालनमा गर्दै आएका किसानको उत्साहलाई समेटेर माथागढी गाउँपालिका वडा नं. ४ को मरमरा, हर्नेटार, चौलानीगैरा, खापुक क्षेत्रमा मौरीको स्मार्ट कृषि कार्यक्रम सञ्चालन गर्ने ज्ञान केन्द्रले तयारी गरेको हो । माथागढी ४ को मरमरा क्षेत्रमा ३ सयभन्दा धेरै काठे मौरीका घार रहेका रहेका छन् । स्थानीय बासिन्दाले बारी, खरबारी र जंगलमा काठको मुढामा मौरी पालेका छन् ।
मरमरामा आयोजित अन्तक्र्रिया कार्यक्रम प्रदेशसभा सदस्य नारायण प्रसाद आचार्यले जैविक वनस्पतीको फुलमा आधारित मौरीपालनबाट उत्पादित महको महत्व बढी भएकाले व्यावसायिक मौरीपालन गर्न किसानहरुलाई आग्रह गनुभयो । ‘राज्य संघीय संरचनामा जानुको अर्थ समानुपातिक विकासको पद्धतिलाई अगाडि बढाउने र तीन वटा सरकार मिलेर ग्रामीण जनतालाई विकासको लाभ दिने नीतिअन्तर्गत मरमरालाई छनौट गरिएको हो ।’, प्रदेशसभा सदस्य आचार्यको भनाई थियो ।
कार्यक्रममा ज्ञान केन्द्रका प्रमुख शिवप्रसाद अर्यालले कृषिबाट रोगजारी, आयआर्जन र उद्यमशीलता बिस्तार हुनुपर्ने अवधारणा सुरु भएको र स्मार्ट कृषि गाउँ कार्यक्रम त्यसकै लागि सञ्चालन हुने बताउनुभयो । उहाँले प्रदेश सरकारले सम्पूर्ण निर्वाचन क्षेत्र र सबै गाउँपालिकामा प्रदेश गौरवको आयोजना स्मार्ट कृषि कार्यक्रम बिस्तार गर्न लागेको जानकारी दिनुभयो ।
समाजसेवी शंकर दर्लामीले साना किसानको जीविकोपार्जनमुखी कृषिलाई व्यावसायिक बनाउने यो कार्यक्रम फलदायी हुने विश्वास व्यक्त गर्नुभयो । शिवबाणि आधारभूत विद्यालयका शिक्षक बीरबहादुर रानाले काठे घारमा मौरी पाल्दा लामो झरी परेका बेला आहारा नपाएर धेरै मौरीका घार मासिएकाले आधुनिक घार र आधुनिक प्रविधि चाहिने रहेछ भन्ने भएको बताउनुभयो । ज्ञान केन्द्रका वागवानी विकास अधिकृत सन्तोष पाठकले अन्तक्र्रियामा सहजीकरण गर्नुभयो ।
प्रदेशको आर्थिक विकास र समृद्धिको पहिलो आधार कृषिलाई परिभाषित गरेको प्रदेश सरकारले उत्पादन दोब्बर बनाउने योजनासहित स्मार्ट कृषि गाउँ कार्यक्रम ल्याएको छ । स्मार्ट कृषि गाउँ कार्यक्रम लागू हुन कम्तिमा एउटा समुदायका ५० घरधुरी हुनुपर्छ । किसानहरुको भेलाले सञ्चालक समिति गठन गरी आवश्यक कार्यक्रम माग गरेपछि यो कार्यक्रम लागू हुनेछ । पाल्पामा दोभानको झेङला, रम्भाको हुँगीमा तानसेनको अर्गली, रामपुरको हेक्लाङमा स्मार्ट कृषि गाउँ कार्यक्रम सञ्चालनमा रहेको छ ।
