एवत सारु, फोक्सिङ्गकोट । रम्भा गाउँपालिका वडा नं. २ फोक्सिङ्गकोटलाई पाल्पा जिल्लाकै पहिलो बालमैत्री वडाको रुपमा घोषणा गरिएको छ ।
लुम्बिनी प्रदेश सभासद नारायणप्रसाद आचार्यले घोषणा पत्र अनावरण गरी फोक्सिङ्गकोटलाई बालमैत्री वडा घोषणा गर्नुभयो । रम्भा गाउँपालिकाको वडा नं. २ फोक्सिङ्गकोटले तोकिएका मापदण्ड पुरा गरेको देखिएपछि बालमैत्री वडा घोषणा गरिएको गाउँपालिकाका अध्यक्ष विष्णुप्रसाद भण्डारीले बताउनुभयो ।
कार्यक्रममा शिक्षा विकास तथा समन्वय इकाइ प्रमुख रमेशराज पौडेल, रम्भा गाउँपालिका अध्यक्ष विष्णुप्रसाद भण्डारी, उपाध्यक्ष राधादेवी श्रेष्ठ, प्रमुख प्रशासकीय अधिकृत कृष्णप्रसाद ढकाल, बालअधिकारकर्मी शालिकराम पाण्डेलगायतले बालबालिकाको सर्वाङ्गीण विकासले मात्र देशको समग्रमा विकास हुने भएकोले बालबालिकाको चौतर्फी विकासको लागि सबैले आआफ्नो तर्फबाट सकारात्मक भूमिका खेल्नुपर्ने बताउनुभयो ।
कार्यक्रममा बालमैत्री स्थानीय शासन लागू गर्न महत्वपूर्ण भूमिका खेल्ने संघसंस्था तथा व्यक्तिहरुलाई सम्मान पत्रद्वारा सम्मान गरिएको थियो । कार्यक्रममा बाल क्लबका तीर्थबहादुर पाँडे, शान्ती सिंजाली, सुष्मा सूर्यवंशी लगायतले बालबालिकाहरुको संगठनमा आबद्ध पश्चात भएको परिवर्तनबारे बोल्नुभएको थियो । रम्भा गाउँपालिकाका श्रोत व्यक्ति काशीराम बस्याल, धनकला थापा, जनविकास पाल्पाका निर्देशक देवीलाल लामिछाने लगायतले बालबालिकाको सर्वाङ्गीण विकासकोलागि अनुकूल वातावरण तयार गर्नु पर्ने बताउनुभयो । कार्यक्रममा बालबालिकाहरुले बाल नृत्यका साथै बालअधिकार सम्बन्धी प्लेकार्डसमेत प्रर्दशन गरेका थिए ।
कार्यक्रम रम्भा गाउँपालिका प्रशासन शाखा प्रमुख भक्तुजङ्ग रानको संचालन तथा बालमैत्री स्थानीय शासन समितिका संयोजक एवम वडा अध्यक्ष उमानसीं सारुको अध्यक्षतामा चलेको थियो ।
