रिब्दीकोट गाउँपालिकाको आठौं गाउँसभा सम्पन्न भएको छ।
गाउँसभाले सहकारी ऐन २०७७ संशोधनसहित विभिन्न कार्यविधि, निर्देशिकाहरू पारित गरेको छ । कृषिकर्जा अनुदानसम्बन्धी कार्यविधि २०७७, स्मार्ट टोलविकास संस्था सम्बन्धी कार्यविधि, रिब्दीकोट गाउँपालिकाको विपद व्यवस्थापन कार्यविधि २०७७ अनुमोदन गरिएको गाउँपालिकाका अध्यक्ष नारायण बहादुर जिसीले बताउनुभयो ।
योसँगै रिब्दीकोट गाउँपालिकाको साझेदारी कार्यक्रम तथा व्यवस्थापन कार्यविधि २०७७ र उत्पादनमा आधारित सुन्तलाजात फलफूलमा अनुदान सम्बन्धी कार्यविधि पनि अनुमोदन गरिएको अध्यक्ष जिसीले जानकारी दिनुभयो। चालु आर्थिक वर्ष २०७७/०७८ को रिब्दीकोटको जम्मा ४८ करोड ९३ लाख २९ हजार बजेट रहेकोमा हालसम्म चालुतर्फ २१ प्रतिशत र पूँजीगततर्फ १२.६८ प्रतिशत खर्च भएको छ ।
गाउँपालिकाले चालु आर्थिक वर्षको लक्ष्य अनुसार ३५ प्रतिशत राजस्व संकलन गरेको जनाएको छ । गाउँसभाका सहभागी जनप्रतिनिधिहरूले पालिकामा विद्युतीय समस्या, खानेपानी, पूर्वाधार, पशुपंक्षी, कृषि, स्वास्थ्य लगायतका समस्या, चुनौती औंल्याएका थिए । स्थानीय सरकार संचालन ऐन २०७४ मा व्यवस्था भए अनुसार स्थानीय तहले वर्षमा दुई पटक गाउँसभा गर्नुपर्ने हुन्छ ।
गाउँपालिकाका अध्यक्ष नारायण बहादुर जी.सी.को अध्यक्षतामा भएको गाउँपालिकाको आठौं गाउँ सभा आर्थिक वर्ष ०७७र०७८ को अर्धवार्षिक कार्य प्रगतिको समीक्षा, स्थानीय जनप्रतिनिधिबाट प्राप्त वडागत समस्या एवम सुझावहरु माथि छलफल गरी गाउँपालिकाको विभिन्न ,नियमावली एबम कार्यविधिहरु पारित गर्दै सम्पन्न भएको सूचना प्रबिधि अधिकृत हेमेन्द्र कुवँरले जानकारी दिनुभयो ।
