बुटवल । लुम्बिनीका नवनियुक्त प्रदेश प्रमुख अमिक शेरचनले आज पदभार ग्रहण गर्नुभएकाे छ ।
मन्त्रिपरिषद् बैठकले लुम्बिनी प्रदेश प्रमुखमा धर्मनाथ यादवलाई हटाएर शेरचनलाई नियुक्त गरेको थियो । प्रदेश प्रमुख शेरचनले आज (शुक्रबार) पदभार ग्रहण गर्नुभएकाे हाे । नयाँ प्रदेश प्रमुखले पदभार ग्रहण गरेसँगै लुम्बिनी प्रदेशसभाका विपक्षी दलहरुले विशेष अधिवेशनका लागि समावेदन गर्ने र मुख्यमन्त्री शंकर पोखरेलविरुद्ध अविश्वास प्रस्ताव दर्ता गर्ने रणनीतिमा छन् ।
शेरचन लुम्बिनीका तेस्रो प्रदेश प्रमुख हुनुहुन्छ । २०७४ साल माघ ७ गते लुम्बिनी प्रदेशको पहिलो प्रदेश प्रमुखको रूपमा उमाकान्त झालाई नेपाली कांग्रेस नेतृत्वको सरकारले नियुक्त गरेको थियो । केपी ओली नेतृत्वको सरकार आएपछि झालाई पदमुक्त गरी धर्मनाथ यादवलाई नियुक्त गर्यो । झापछि शेरचन नियुक्त हुनुभएकाे हाे ।
पदबहाल गर्दै प्रदेशप्रमुख शेरचनले संविधानले दिएको अधिकार भन्दा बाहिर कोही पनि नरहेको बताउँदै आफूले पनि त्यहिँभित्र बसेर काम गर्ने प्रतिबद्धता गर्नुभएकाे छ । कसैले पनि संविधान नाघेर हिँड्ने अवस्था आउन दिन नहुने बताउँदै शेरचनले शान्ति र संवैधानिक तरिकाले प्रदेश चलाउने बताउनुभयाे । गण्डकीबाट आफूलाई हटाइएको स्मरण गर्दै शेरचनले यतिबेला पुनः आवश्यकताले आफूलाई लुम्बिनीमा पठाइएको प्रष्टीकरण दिनुभयाे ।
