पाल्पा । नेपाल पत्रकार महासंघ, पाल्पाले वरिष्ठ पत्रकार विनयकुमार कसजूलाई मरणोपरान्त राष्ट्रिय पत्रकारिता पुरस्कार प्रदान गरेको छ।
नेपाल पत्रकार महासंघको ६६औं स्थापना दिवसका अवसरमा तानसेनमा आयोजित कार्यक्रममा कसजूको जीवनसाथी गंगादेवी कसजूलाई नगद ५० हजार, दोसल्ला र प्रमाणपत्र हस्तान्तरण गरिएको हो। कार्यक्रमका प्रमुख अतिथि लुम्बिनी प्रदेशका प्रदेशसभा सदस्य नारायणप्रसाद आचार्यले पुरस्कार प्रदान गर्नुभयो । २०४० सालमा सत्य साप्ताहिक पत्रिका प्रकाशनमा ल्याएका कसजूले प्रजातन्त्र पुनस्थापनापछि २०५० सालमा विकास पत्रकारिताका लागि ‘देउराली’ पत्रिका प्रकाशनमा ल्याउनुभएको थियो । राष्ट्रिय सूचना आयोगको पहिलो प्रमुख आयुक्त हुनुभएका कसजूका सूचना सञ्चार, पत्रकारिता, लघुकथा र बालसाहित्य विधामा दर्जनौं किताब प्रकाशित छन् ।
यसैगरी नेपाल पत्रकार महासंघ, पाल्पा शाखालाई संस्थागततर्फको राष्ट्रिय पत्रकारिता पुरस्कार प्रदान गरिएको छ । पुरस्कारको राशी नगद ५० हजार रूपैयाँ रहेको छ । लेखक तथा पत्रकार नीलकण्ठ न्यौपानेलाई विकास पत्रकारिता पुरस्कार प्रदान गरिएको छ । यसको राशी नगद २५ हजार रूपैयाँ रहेको छ। नेपाल पत्रकार महासंघ पाल्पाका पूर्वसभापति गोविन्द भट्टराइले पुरस्कृत व्यक्तिहरूको चिनारी र पुरस्कारको स्थापनाका प्रसंगबारे प्रकाश पार्नुभयो ।
प्रदेशसभा सदस्य नारायणप्रसाद आचार्य, अर्का प्रदेशसभा सदस्य वीरबहादुर राना, तानसेन नगरपालिकाका प्रमुख अशोक कुमार शाही, प्रमुख जिल्ला अधिकारी योगेन्द्रप्रसाद पाण्डेय, वरिष्ठ पत्रकार मेघराज शर्मा, लुम्बिनी मेडिकल कलेजका कम्पनी सचिव निर्दोष खनाल, त्रिभुवन बहुमुखी क्याम्पसका क्याम्पस प्रमुख टंक भट्टराई, पत्रकार महासंघ पाल्पाका पूर्वसभापति झपेन्द्र गैरे, भगवान भण्डारी लगायतले कसजू र सम्मानित व्यक्तिले पत्रकारिताबाट पाल्पामा पुर्याएको योगदानबारे चर्चा गर्नुभएको थियो। गंगा कसजू, नीलकण्ठ न्यौपानेले पुरस्कार प्रदान गरेकोमा महासंघलाई धन्यवाद दिनुभयो ।
तानसेनस्थित लुम्बिनी मेडिकल कलेजले पत्रकारिता क्षेत्रमा योगदान दिएकालाई सम्मान गर्न महासंघ पाल्पामा ७ लाख अक्षयकोष स्थापना गरेको छ । कार्यक्रम सचिव किरण कौशलको सञ्चालन, उपाध्यक्ष भरत शर्माको स्वागत र अध्यक्ष राजेशकुमार अर्यालको अध्यक्षतामा चलेको थियो ।
