टेलिभिजन पाठशालाका शिक्षक सम्मानित

पाल्पा।  ग्रामीण शिक्षा तथा वातावरण विकास केन्द्र रिड नेपालले टेलिभिजन पाठशाला हेर्दै सिक्दैका ९ जना शिक्षकहरुलाई सम्मान गरेकाे छ ।

तानसेन नगरपालिकासँगकाे समन्वयमा श्रीनगर टेलिभिजनबाट सञ्चालित पाठशालमा पढाएका  शिक्षकहरु कृष्ण मल्ल, हरिलाल गैरे, झविन्द्र देवकोटा, हेमन्त पराजुली, एकराज ज्ञवाली, लालकुमारी खाम्चा, टंक भुषाल, भावना खनाल र विमला सापकोटालाई सम्मान गरिएकाे हो । देववाणी साधारण तथा संस्कृत माध्यमिक विद्यालय, जनप्रिय माध्यमिक विद्यालय, लुम्बिनी माध्यमिक विद्यालय, श्रीनगर टेलिभिजन र समितिका पदाधिकारीहरु संयोजक कृष्णबहादुर थापा, सदस्य हिरा आचार्य र सदस्य दीपक गौतमलाई समेत सम्मान गरिएकाे छ ।

तानसेन नगरप्रमुख अशोककुमार शाहीले दशैं तिहारसम्म विद्यालय खुल्ने सम्भावना कम रहेकोले विद्यार्थी  रअभिभावक शिक्षा दिनुपर्ने कुरामा जोड दिनुभयो । उहाँले सम्मानित शिक्षकहरुलाई बधाई दिदै यो कार्यक्रम मार्फत शिक्षण गर्ने शिक्षकहरु परीक्षामा राेल मोडलको भुमीकामा स्थापित हुन सफल हुनुभएको बताउनु भयो । पाठशालाका संयोजक कृष्णबहादुर थापाले लकडाउनको भयावह स्थितिमा समेत शिक्षकहरुले गर्नुभएको मेहनत सबैका लागि प्रेरणादायी रहेकाे बताउनुभयाे । रिड नेपालका शिक्षा संयोजक कपिल पुरीले सामाजिक रुपमा त्रसित हुने बेलामा बालबालिकाको सिकाइलाई प्राथमिकतामा राखेर काम गर्ने सबैलाई धन्दवाद दिनुभयाे ।  उहाँले विपन्न गरिव परिवारका बालबालिकाहरुलाई ६ सय ५१ वटा रेडियो सेट वितरण गरेको समेत सुनाउनुभयो ।


कार्यक्रममा श्रीनगर टेलिभिजनका कमलराज तिमिल्सिना, शिक्षक झविन्द्र देवकोटा र भावना खनालले शिक्षण गर्दाका आ–आफ्ना अनुभवहरु सुनाउनु भएको थियो । लुम्बिनी माध्यमिक विद्यालयका शिक्षक हरिप्रसाद पोखरेलको स्वागतबाट शुरु भएको कार्यक्रमको सञ्चालन जनप्रिय माध्यमिक विद्यालयका प्रधानाध्यापक हिरा आचार्यले गर्नुभएको थियो । रिड नेपालको आर्थिक सहयोगमा सञ्चालित कार्यक्रम गत जेठ ११ गते देखि साउन ७ गतेसम्म चलेको थियो ।