पूर्वखोला । पूर्वखोला गाउँपालिकाले संस्थागत विद्यालय समायोजनको प्रक्रियालाई चालु आर्थिक वर्षभित्रै सम्पन्न गर्ने योजना अगाडि सारेको छ ।
पूर्वखोला गाउँपालिकाको आठौँ गाउँसभामा जनप्रतिनिधिहरुले राखेका जिज्ञासकाको जवाफ दिदै गाउँपालिका अध्यक्ष नुनबहादुर थापाले संस्थागत विद्यालयलाई सामुदायिक विद्यालयमा समायोजन प्रक्रिया चालु आर्थिक वर्षभित्र सम्पन्न गर्ने गरी योजना बनाइएको बताउनुभयो । शिक्षा नियमावली २०७७ जारी भएसँगै संस्थागत विद्यालयको नाममा रहेका जग्गा, भवन, फर्निचरलगायतका सामग्री सरकारको स्वामित्वमा ल्याइने र त्यसका लागि करिव पौने २ करोड लाग्ने अनुमान गरिएको उहाँले बताउनुभयो । दुई वर्ष अगाडि निजी विद्यालयहरु सामुदायिक विद्यालयमा समायोजन घोषणा गरेको पूर्वखोलाले अंग्रेजी र नेपाली माध्यममा पठनपाठन गर्दै आएको छ ।
गाउँसभाले विपद, वातावरण, शिक्षा, स्वस्थ्य, खानेपानी, सुरक्षित आवास, सार्वजनिक जवाफदेहिता, सूचना तथा अभिलेख केन्द्रलगायतका १४ वटा ऐन, नियमावली र कार्यविधिहरु पारित गरेको छ । ‘शिक्षा, स्वास्थ्य, सडक, कृषि, पर्यटनसहितको पूर्वाधार, पूर्वखोला विकासको आधार’ भन्ने नारासहित सञ्चालित गाउँसभाले केही योजनाहरु संशोधन र थप गरेको छ ।
आठौँ गाउँसभाबाट भएका निर्णयहरुको जानकारी दिन आयोजित पत्रकार सम्मेलनमा गाउँपालिकाका अध्यक्ष नुनबहादुर थापाले ऐन कानुनको निर्माण, जनशक्ति व्यवस्थापन र योजना सञ्चालनका आधारहरु तयार गरेपछि पालिकाको विकास निर्माणको गति बढेको बताउनुभयो । शिक्षा, स्वास्थ्य, खानेपानी, सडक सञ्जाल र कृषि क्षेत्रमा देखिने गरी फड्को मारेको बताउँदै अध्यक्ष थापाले विकासका लहरहरुलाई प्रचारप्रसारको खाँचो औंल्याउनुभयो ।
गाउँपालिका उपाध्यक्ष भागिरथी भट्टराईले चालु आर्थिक वर्षको कुल ४८ करोड ७९ लाख ६५ हजार रुपैँया बराबरको बजेटबाट ३६२ योजना प्रस्ताव गरिएकोमा यो ६ महिनाको अवधिमा १५ योजना निर्माण कार्य सम्पन्न र ८५ वटा कार्यान्वयनमा रहेको जानकारी दिनुभयो । उपाध्यक्ष भट्टराईले कतिपय योजना संशोधन, प्रदेश र संघीय सरकारसँग थप नयाँ योजना माग गर्ने निर्णय भएको बताउनुभयो । कार्यक्रममा गाउँपालिकाका प्रवक्ता नीरबहादुर सारुले चालु आर्थिक वर्षमा विनियोजित बजेटमध्ये हालसम्म १९ प्रतिशत बजेट खर्च भएको बताउनुभयो । उहाँले कोरोना महामारीका बीचमा पनि विकास निर्माणको काम धमाधम भएको जानकारी दिनुभयो ।
प्रमुख प्रशासकीय अधिकृत ज्ञानुप्रसाद पनेरुले गाउँपालिकाको संस्थागत र कार्यसम्पादन क्षमतामा सुधार भएको बताउँदै अनलाइन घटना दर्ता, सुत्र प्रणाली लागू, सबै शाखामा विद्युतीय सफ्टवयर जडान गरिएको जानकारी दिनुभयो । प्रमुख प्रशासकीय अधिकृत पनेरुले शिक्षा, स्वास्थ्य, सडक पूर्वाधार निर्माण, कृषि पकेट क्षेत्र निर्माणमा पूर्वखोलाले महत्वपूर्ण काम गरेको र आर्थिक वर्षको समाप्तिसम्म नयाँ कामहरू देखिने बताउनुभयो ।
कार्यक्रममा पत्रकार महासंघ पाल्पा शाखाका अध्यक्ष राजेशकुमार अर्यालले संस्थागत र सामुदायिक विद्यालयलाई एउटै बनाउने योजना कार्यान्वयन गरेर उदाहरणीय कार्य गरेको बताउनुभयो । उहाँले कृषि उत्पादनमा बृद्धि र स्वास्थ्य क्षेत्रको विकासमा समेत पूर्वखोला गाउँपालिकाले उल्लेखनीय काम गरेको बताउनुभयो । गाउँपालिकाले गरेका कतिपय काम पनि प्रचारप्रसार हुन नसकेको बताउँदै उहाँले आफूले गरेको काम भन्न र देखाउन सक्नुपर्ने बताउनुभयो । कार्यक्रममा पत्रकारहरू माधव अर्याल, रेखीराम राना, कृष्ण कार्की, यज्ञमूर्ति तिमिल्सिना, किरण कौशल, मिलन विश्वकर्मा, छवी खनाललगायतले सुझाव दिनुभएको थियो ।
कार्यक्रम गाउँपालिकाका अध्यक्ष नुनबहादुर थापाको अध्यक्षता, उपाध्यक्ष भागीरथी भट्टराईको स्वागत र प्रमुख प्रशासकीय अधिकृत ज्ञानुप्रसाद पनेरुको संचालनमा सम्पन्न भएको थियो ।