विजयकुमार बौडेल –
भाद्र ८ – पाल्पाको बगनासकालीमा टोल विकास संस्थाको नेतृत्व चयनका लागी निर्वाचन भएको छ ।
बगनासकाली गाउँपालिका वडा नं. ५ को लाङघाली टोल बिकास संस्थाको नेतृत्व चयनका लागी दुई समुह बीच निर्वाचन भएको हो । बगनासकाली गाउँपालिकामा यसभन्दा अघि ७५ वटा टोल विकास संस्थाको गठन भईसकेको बगनासकाली गाउँपालिकाका प्रवक्ता टिका बहादुर थापाले जानकारी दिनुभयो । अन्तिम टोल विकास समिति गठन गर्ने क्रममा दुई समुह बीच सहमती हुन नसक्दा निर्वाचन प्रणालीमै गएर नेतृत्व चयन भएको वडाध्यक्ष ओम प्रकाश गैरेले जानकारी दिनुभयो ।
निर्वाचन मार्फत लाङघाली टोल बिकास संस्थाको अध्यक्षमा रन बहादुर खाम्चा चयन हुनुभएको हो । उहाँका निकटतम प्रतिष्पर्धी भुवन सिंह खाम्चालाई पराजित गर्दै रन बहादुर विजयी हुनुभएको हो । ६० जना टोलबासीले नेतृत्व चयनका लागी मतदान गरेका थिए । जसमा ४० मत ल्याएर रन बहादुर खाम्चा विजयी हुनुभएको हो । भुवन सिंह खाम्चाले १९ मत प्राप्त गर्नुभयो भने १ मत बदर भएको वडा कार्यालय दर्लमडाँडाका वडा सचिव गोपाल न्यौपानेले जानकारी दिनुभयो ।
बगनासकाली गाउँपालिकाले प्रशासकीय कार्यविधि नियमित गर्ने ऐन २०७४ स्वीकृत गरे पछि पालिकाका ९ वटै वडाका टोलहरुमा टोल बिकास संस्थाहरु गठन गरिएको हो ।