विजयकुमार बौडेल –
५ असोज – चाडवाड नजिकिँदै गर्दा तानसेन बजारका एक सय दश वटा पसलमा गनुगमन गरिएको छ । अनुगमनका क्रममा अधिकांश पसलहरुमा म्याद नाघेका वस्तुहरु फेला परेका छन् ।
संयूक्त बजार अनुगमन समितिले बुधबार र बिहिबार तानसेन बजारका पसलमा अनुगमन गर्दा ६३ हजार ४ सय १५ रुपैंया बराबरको सामग्री जफत गरेको छ । सदरमुकाम तानसेनमा अनुगमन गर्दा व्यापारी तथा व्यावसायीले उपभोक्तालाई म्याद नाघेका अखाद्य पदार्थ तथा शृंगारका सामान बिक्री गरेको फेला परेको हो ।
जिल्ला प्रशासन कार्यालय, तानसेन नगरपालिका, खाद्य तथा गुण नियन्त्रण कार्यालय र घरेलु तथा साना उद्योग कार्यालय पाल्पाको संयुक्त अनुगमन टोलीले तानसेनमा गरेको अनुगमनका क्रममा अखाद्य वस्तु फेला परेको घरेलु तथा साना उद्योग कार्यालयका प्रमुख देवीराम भण्डारीले बताउनुभयो ।
टोलीले तानसेनको कैलाशनगर, भगवतीटोल, असलटोल, नारायणस्थान, मखनटोल, बसपार्क, लहरेपिपल, वसन्तपुरलगाएतका स्थानमा बजार अनुगमन गरेको थियो । अनुगमन टोलीले केही वर्षअघि नै म्याद गुज्रेका, नरिवल जुस, कुरकुरे, कुकिज, मसला, फ्रुटी, ओरेन्ज जुस, बदाम जुस, कोक, फेण्टा, स्प्राईट, सुजी, बियरलगाएतका सामग्री व्यापारीले उपभोक्तलाई बिक्री गरेको फेला पारेको खाद्य तथा गुण नियन्त्रण कार्यालय पाल्पाका नरेश श्रेष्ठले बताउनुभयो ।
यस्तै, म्याद नाघेर पनि प्रयोग गर्न नमिल्ने शृंगारका सामग्री क्रिम, तेललगायतका वस्तुसमेत टोलीले जफत गरेको जिल्ला पशासन कार्यालय पाल्पाका यज्ञश्वर पन्थीले बताउनुभयो । प्रयोगका लागि उपयुक्त नभएका सामग्री जफत गरेर नष्ट गरिएको उहाँले बताउनुभयो । अनुगमनका क्रममा मूल्यसूची टाँस नभएको, पसल दर्ता नगरी सञ्चालन गरेको, होडिङ बोर्ड नराखेको जस्ता कमजोरी भेटिएको तानसेन नगरपालिकाका बरिष्ठ अधिकृत दुर्गा बहादुर थापाले बताउनुभयो ।
घरेलु कार्यालयले तयार गरेको कार्ययोजना अनुसार उपभोक्ताको खाद्य अधिकार स्थापित गर्न र बजारमा स्वस्थ प्रतिस्पर्धा कायम गर्न बजार अनुगमन गरिएको तानसेन नगरपालिकाका बरिष्ठ अधिकृत भरत प्रसाद आचार्यले जानकारी दिनुभयो । चाडपर्व नजिकिएसँगै बजारमा धेरै सामग्रीको माग हुने गर्छ । यही मौका पारी चाडपर्वका बेला म्याद गुज्रिएका सामानहरू धेरै मात्रामा बिक्री वितरण हुने गरेको वडा नं. २ का वडा सचिव जिवन नेपालीले जानकारी दिनुभयो ।