पाल्पा । कोरोना संक्रमणको डरले कुखुरा बिक्री नभएपछि पाल्पाको भुवनपोखरीका किसानले ६ हजार ज्यूँदो कुखुरा मारेर फालेका छन् ।
रैनादेवी छहरा गाउँपालिका वडा नं. ३ का ५ जना कुखुरापालक किसानले कोरना भाइरसका करिव ६ हजार बोइलर कुखुरा मारेर फालेका हुन् । हुर्किएका कुखुरा बिक्री नहुने, सित्तैमा दिँदा पनि कसैले नखाने, पाल्दा थप लगानी लाग्ने र ऋण मात्र बढ्ने भएकाले कुखुरा मार्नुपरेको किसान बेदप्रसाद मरासिनीले बताउनुभयो । हाइलाइट कृषि तथा पशुपंक्षी फर्म र जयमूर्ति कृषि तथा पशुपंक्षी फर्मले मात्र ५ हजार कुखुरा मारेका छन् ।
रैनादेवी छहरा भुवनपोखरीका बेदप्रसाद मरासिनीले ३ हजार, खुमानन्द मरासिनीले २ हजार, मोहन पौडेलले ५ सय, प्रकाश बिकले ३ सय, र धर्म पौडेलले ५ सय वटा कुखुरा मारी खाल्डो खनेर पुर्नुभएको छ । ज्योति विकास वैंकबाट २० लाख रुपैँया ऋण लिएर कुखुरा पाल्न थाल्नुभएका बेदप्रसाद मरासिनीले ६ हजार कुखुरा मार्दा करिव १५ लाख रुपैँया नोक्सान भएको बताउनुभयो । उहाँले भन्नुभयो, कुखुराको चल्ला, ‘दाना, भिटामिन, औषधी, भुस गर्दा मात्र १५ लाखभन्दा बढी लाग्यो, अहिले बेच्ने बेला भएका कुखुरा मार्न प¥यो ।’
दैनिक ६ क्विन्टल दाना चाहिने, डिलरले दाना पु¥याउन नसक्ने, दाना कम्पनी बन्द हुने र बिक्री नहुने स्थिति भएपछि कुखुरा मारेर हटाउन बाध्य भएको खुमानन्द मरासिनीले बताउनुभयो । ‘मेरो खोरमा अझै १ हजारभन्दा बढी ३ किलो भएका कुखुरा छन् । मार्नभन्दा व्यवस्थापन गर्न गाह्रो भएपछि राखेको छु । छिट्टै हटाउनुपर्ला ।’ रैनादेवी छहरा गाउँपालिका वडा नं. ३ का वडाअध्यक्ष लालबहादुर दर्लामीले किसानहरुले डेढ, दुई र तीन किलो तौलका कुखुरा धमाधम मारेको देख्दा आफूलाई पीर परेको बताउनुभयो । किसानको लगानी फिर्ता हुने गरी मात्र पनि राहत दिन सके कृषिमा लगानी गर्नेहरु निरुत्साहित नहुने वडाअध्यक्ष दर्लामीको भनाई छ ।
गाउँपालिकाका अध्यक्ष रामबहादुर कार्कीले किसानले कुखुरा मारेको थाहा पाएपछि बुझ्न प्रमुख प्रशासकीय अधिकृतक केवी खत्रीको नेतृत्वमा कर्मचारी पठाएको बताउनुभयो । भारतबाट आएको कुखुरा रोक्न नसक्ने स्थानीय सरकारले लाखौँको नोक्सानी हुँदा पनि किसानको कुरा नसुनेको सरोकारवालाको गुनासो रहेको छ ।
