बहुप्रतिक्षित कालिगण्डकी लिफ्टिङ्ग खानेपानी आयोजनाको पानी हप्ता दस दिनभित्र तानसेनमा आउने भएको छ ।
निर्धारित मितिभन्दा दुई वर्ष ढिलो गरी आयोजनाको पानी ५ लिफ्ट गरी तानसेनमा खस्ने भएको हो । २०७२ सालमा सम्भाव्यता अध्ययन गरी २०७५ साल मंसिर ५ गते १८ महिनामा सम्पन्न गर्ने लक्ष्यका साथ सुरू भएको आयोजना २०७७ माघ सम्ममा पानी झर्ने अवस्थामा आइपुग्ने भएको छ । तानसेन खानेपानी उपभोक्ता समितिका कार्यालय प्रमुख दिवाकर अर्याले अब एक हप्ताभित्र गण्डकीको पानी तानसेन आउने बताउनुभयो ।
कालीगण्डकीदेखि बौघागुम्वासम्म पानी लिफ्ट हुने छ भने बौघागुम्वाबाट तानसेनको मुख्य ट्याड्ढी बतासेसम्म ग्राविटी फलोबाट पानी ल्याईने छ । कालीगण्डकी नजिक इनार ‘कलेक्टर वेल’ देखि तानसेनको मुख्य ट्यांकीसम्म ८ ईञ्चको १० किलोमिटर पाइप बिछ्याइएको छ । प्रतिसेकेण्ड ४० लिटर पानी बतासेको ट्याङ्कीमा झर्ने आयोजनाको लक्ष्य छ ।
तानसेन बजारमा दैनिक २५ लाख लिटर पानीको आवश्यकता भएपनि अहिले दैनिक रुपमा ७ /८ लाख लिटर पानी मात्र वितरण हुँदै आएको छ । कालीगण्डकी लिफ्ट आयोजना पुरा भएपछि दैनिक १८ लाख लिटर पानी थप हुनेछ । कालीगण्डकी लिफ्ट खानेपानी आयोजना सञ्चालनपछि अबको १० बर्ष सम्म तानसेनमा पानीको समस्या पूर्ण रुपमा हट्ने तानसेन उपभोक्ता समितिका कार्यवहाक अध्यक्ष डा. पुरनमान बज्राचार्यले बताउनुभयो ।
२०३५ सालसम्म ढुङ्गेधारामा निर्भर तानसेनवासीले २०३५ सालमा जापान सरकारको आर्थिक तथा प्राविधिक सहयोगमा भुल्के खानेपानी योजनाबाट लिफ्ट गरी पानी उपभोग गर्दै आएका थिए । परम्परागत धारा, भुल्के र सिस्ने योजनाले तानसेनको खानेपानी माग पूरा गर्न नसकेपछि कालीगण्डकी लिफ्ट आयोजना सुरू गरिएको हो ।
