चैत २८ – पाल्पा जिल्लामा विभिन्न क्वारेन्टाइनमा रहेका ४१ जनाकै कोरोना संक्रमण नभएको रिपोर्ट आएको छ ।
कोरोना संक्रमणको द्रूत परिक्षण आरडिपी गर्दा सबै जनाको रिपोर्ट नकारात्मक अर्थात् नेगेटिभ आएको स्वास्थ्य कार्यालय पाल्पाका निमित्त प्रमुख विश्वनाथ न्यौपानेले बताउनुभयो । पूर्वखोला गाउँपालिकाको २१, रामपुर नगरपालिकाको ९, रिब्दीकोट गाउँपालिकाको ३ र रैनादेवी छहरा गाउँपालिकाको ८ गरी ४१ जनाको आज दिउँसो परिक्षण गरिएको पाल्पाका प्रमुख जिल्ला अधिकारी यादव सुवेदीले बताउनुभयो ।
क्वारेन्टाइनमा रहेका अधिकांश युवा भारतको मुम्बईबाट फर्किएपछि चैत्र १२ देखि बसेका हुन् । लुम्बिनी मेडिकल कलेज र युनाइटेड मिसन अस्पतालका तालिम प्राप्त जनशक्ति सहित दुई समुह पूर्व र पश्चिमका क्वारेन्टाइनमा परिक्षणका लागि खटाइएको हो । कोरोना संक्रमण रोकथाम, नियन्त्रण तथा उपचार सहजीकरण समितिले परिक्षणमा नेगेटिभ देखिएकाहरुलाई घरको क्वारेन्टाइनमा एक हप्ता बस्ने गरी पठाउने निर्णय गरेको छ ।
पोजेटिभ देखिएमा स्वाव निकालेर सम्बन्धित पालिकाको एम्बुलेन्स मार्फत् अस्पतालमा ल्याएर आइसोलेसनमा राख्ने समेत तयारी रहेको थियो ।
