पाल्पा । लुम्बिनी प्रदेशका मुख्यमन्त्री शंकर पोखरेलले प्रधानमन्त्री केपी ओलीको कार्यकालमा कालापानी, लिपुलेक र लिम्पियाधुरा समेटिएको नक्सा जारी भएपछि पाटीभित्र समस्या उत्पन्न भएको बताउनुभएको छ ।
नेकपा तानसेन नगरस्तरीय अगुवा कार्यकर्ता भेलालाई सम्बोधन गर्दै उहाँले यस्तो बताउनुभएको हो । नेपालको नयाँ नक्सा संसदबाट सर्वसम्मत पारित गराएपछि राष्ट्रवादी कार्यले प्रधानमन्त्री केपी ओली लोकप्रिय हुने डरले अर्का अध्यक्ष पुष्पकमल दाहाल षडयन्त्रमा उत्रिएको उहाँको भनाई छ । मुख्यमन्त्री पोखरेलले षडयन्त्रको भ¥याङ प्रधानमन्त्रीले झिकिदिएपछि उनीहरुको दाँतबाट पसिना निस्किएको छ भन्नुभयो । प्रचण्ड र माधव नेपालले पार्टी र राज्य सत्ता कब्जा गर्ने षडयन्त्र गरेर घेराबन्दी गरेको उहाँको दावी थियो ।
प्रचण्ड र माधव हल्लिएको दाँतजस्तै
प्रचण्ड र माधव हल्लिएको दाँतजस्तै भएको उहाँले टिप्पणी गर्नुभयो । ‘जुन उखेलेर फालेपछि नयाँ र बलियो दाँत पलाउने छ । हल्लिएको कच्चा दाँतका रुपमा रहेका उनीहरु निस्किएर गएपछि ओली नेतृत्वको पार्टी बलियो भएर अगाडि बढ्छ ।’ व्यक्तिका लागि नभइ अब राष्ट्रका निम्ती पार्टी एकता प्रक्रिया अगाडि बढ्ने नेता पोखरेलले बताउनुभयो ।
नेकपा स्थायी कमिटी सदस्य पोखरेलले व्यक्तिलाई केन्द्रमा राखेर गरिएको एकता प्रक्रिया पूरा हुन नपाएको बताउनुभयो । ‘अहिले माइतिघर मण्डलामा पुगेर हामी यहाँ छम भनेर भन्नु परेको छ । त्यहीमाथि माधव कुमार नेपाल र पुष्पकमल दाहालको ट्याग झुण्डाएर योभन्दा दुखदायी स्थिति के हुन सक्छ ।’ उहाँले सच्चिएर मूल घरमै आउनुहोस् बाटो खुला छ भन्ने आग्रह गर्नुभयो ।
कार्यक्रममा नेकपाका केन्द्रीय सदस्य तथा युवा नेता महेष बस्नेतले साविक एमालेका ९५ प्रतिशत नेता कार्यकर्ता ओलीसँग र साविक माओवादीका ८०\८५ प्रतिशत नेता कार्यकर्ता प्रचण्डसँग रहेको बताउनुभयो । उहाँले मिडियामा भ्रम छर्दै हिडेको भए पनि तल्लो तहका कार्यकर्तामा कुनै भ्रम नरहेको विचार व्यक्त गर्नुभयो । उहाँले भन्नुभयो, साइबर सेना स्याल होइन, अब सिंह बन्नेछन् । साइबर सेनाले प्रचण्ड माधवलाई ठेगान लगाउने दावी गर्नुभयो ।
नेकपाका केन्द्रीय सदस्य तथा जिल्ला अध्यक्ष नारायणप्रसाद आचार्यले केपी ओली नेतृत्वमा रहेको पार्टी नै मूल प्रवाह भएको र पाल्पामा यसकै बहुमत रहेको दावी गर्नुभयो । राष्ट्रिय युवा संघका नेता किरण पौडेल, बगनासकाली गाउँपालिकाका उपाध्यक्ष सरस्वती चिदी, टिका थापालगायतले बोल्नुभएको थियो ।
भेलाले टीकाबहादुर थापाको अध्यक्षतामा २ सय ६१ सदस्यीय युवा संघ, जिल्ला समिति पनि घोषणा गरेको छ । युवा नेता तुलबहादुर अधिकारीको सञ्चालन र तानसेन नगर कमिटीका अध्यक्ष रामप्रसाद पोखरेलको अध्यक्षतामा कार्यक्रम चलेको थियो ।