बैशाख १ – नेपाली क्रिकेट समर्थक समाज पाल्पा र रुपन्देही विच भएको मैत्रीपुर्ण क्रिकेट प्रतियोगितामा पाल्पा विजयी भएको छ ।
दमकडा खेल मैदानमा भएको टि–२० क्रिकेट प्रतियोगितामा पाल्पाले रुपन्देहीलाई ३ रनले पराजित गरेको हो । टस जितेर पहिले व्यटिङ गरेको पाल्पाले निर्धारित २० ओभरमा १५ ओभर खेल्दै सबै विकेट गुमाएर ९० रनको योगफल तयार पार्यो । पाल्पाका विजय बौडेलले सर्वाधिक १८, सुजित थापाले १४ तथा अच्यूत पाण्डेय र सन्दिप गैरेले समान १०÷१० रन बनाए । रुपन्देहीका अमृत पाण्डेयले ३ विकेट लिए ।
९१ रनको सामान्य लक्ष्य पछ्याउँदै जवाफी ब्याटिङमा उत्रेको रुपन्देही ८७ रनमै समेटियो । रुपन्देहीका अमृत पाण्डेयले १५ र तारा पाठकले १४ रन बाहेक अरु खेलाडीले दोहोरो अंक बटुल्न सकेनन् । पाल्पाका शिशिर कोईरालाले ३ तथा सुजित थापा र विपिन खडालले समान २/२ विकेट लिए । १८ रन र १ विकेट लिएका विजय बौडेल म्यान अफ दि म्याच घोषित भए ।
नेपाली क्रिकेट समर्थक समाजका केन्द्रिय कोषाध्यक्ष अच्यूत पाण्डेले क्रिकेटको विकासका लागी दुवै छिमेकी जिल्लाको महत्वपुर्ण भुमिका भएको बताउनुभयो । नेपाली क्रिकेट समर्थक समाज केन्द्रिय सहसचिव मोहन ज्ञवालीले क्रिकेटलाई समर्थन गर्नेहरुको मैत्रीपुर्ण खेलले दुई जिल्लाको भाईचारा बढाउने र क्रिकेट विकासको लागी खुड्किलो थपिने बताउनुभयो ।
यसअघी पनी रुपन्देहीको तिलोत्तमा क्रिकेट मैदानमा रुपन्देही र पाल्पा विच स्वर्गिय अम्पायर सुनिल ढुङ्गानको स्मृतीमा मैत्रीपुर्ण खेल सञ्चालन भएको थियो । नेपाली क्रिकेट समर्थक समाज पाल्पा र रुपन्देहीले क्रिकेटको समग्र विकासका लागी महत्वपुर्ण भुमिका निर्वाह गर्दै आईरहेका छन् ।