विजयकुमार बौडेल –
असोज ५ – प्रेस चौतारी नेपालका केन्द्रिय सचिव तथा लुम्बिनी प्रदेश ईन्चार्ज प्रदिप आचार्यले पत्रकारितामा यूवा पुस्ता आउन जरुरी रहेको बताउनुभएको छ ।
प्रेस चौतारी नेपाल, पाल्पाले तानसेनमा गरेको स्वागत कार्यक्रममा बोल्दै केन्द्रिय सचिव आचार्यले हरेक स्थानीय तहका असल अभ्यास र बेथिती बाहिर ल्याउन यूवाहरु पत्रकारिता क्षेत्रमा आउनुपर्ने बताउनुभएको हो । नयाँ पुस्तालाई पत्रकारीतामा ल्याउनका लागी प्रेस चौतारी नेपालले विभिन्न प्रशिक्षक प्रशिक्षण तालिम सञ्चालन गर्ने तयारी गरिरहेको बताउँदै आचार्यले हरेक जिल्लाका शाखाहरु संग समन्वय गरेर अघि बढ्ने बताउनुभयो ।
आचार्यले मुलुकको अप्ठेरो राजनैतिक अवस्थामा पत्रकारले लोकतन्त्र बँचाउन भुमिका खेल्नुपर्ने समेत बताउनुभयो । आचार्यले वर्तमान राजनीतिक अवस्थामा पत्रकारले लोकतन्त्र बचाउन महत्वपुर्ण भुमिका खेल्नुपर्ने बताउनुभयो । पत्रकारलाई समाजको ऐनाको रुपमा नागरिकले बुझेको उल्लेख गर्दै आचार्यले जनताको आवाज स्थानीय, प्रदेश र संघिय सरकारको कान सम्म पुर्याउने पुलको रुपमा काम गर्नुपर्ने बताउनुभयो ।
स्वागत कार्यक्रममा प्रेस चौतारीको वर्तमान अवस्था र भावि कार्यदिशाबारे छलफल गरिएको थियो । प्रदेश सह–ईन्चार्ज कमलराज तिमिल्सेनाले व्यवसायिक सुदृढिकरणसँगै संगठन बलियो बनाउने अभियानमा लाग्नुपर्ने बताउनुभयो । तिमिल्सेनाले सञ्चारमाध्यमलाई समानुपातिक रुपमा बलियो बनाउन सरकारले ध्यान दिनुपर्ने बताउनुभयो ।
कार्यक्रममा प्रेस चौतारी नेपालका पाल्पा ईन्चार्ज मिलन विकले प्रदेश भित्रका १२ वटै जिल्ला समितिहरुबीच समन्वय गरेर काम गर्नुपर्ने बताउनुभयो । विकले प्रदेशका सबै जिल्लाहरुबीच पत्रकारिता र यसका संभाव्यता बारे छलफल गरि नयाँ पुस्तालाई पत्रकारिता क्षेत्रमा ल्याउन संगठनले ध्यान दिएर काम गर्नुपर्ने बताउनुभयो ।
प्रेस चौतारी नेपाल, पाल्पाका अध्यक्ष कृष्ण कार्कीले देशै भरीका शाखाहरुलाई सिकाइ हुने गरि पाल्पाको संगठन अघि बढेको बताउनुभयो । कार्कीले संगठनको संस्थागत विकासका लागी स्थानीय तहहरु संग समन्वय गर्दै पत्रकारिता क्षेत्रमा यूवाहरुको आकर्षण बढाउन पाल्पाको संगठन लागीपरेको बताउनुभयो ।