विजयकुमार बौडेल –
फागुन २२ – जिल्ला प्रशासन कार्यालय पाल्पाले भेला, सभा, सम्मेलन, मेला, उत्सव तथा महोत्सव लगाएतका कार्यक्रमहरु नगर्न अनुरोध गरेको छ ।
विश्वभरीका करिव ७७ मुलुकमा फैलिएको नोभल कोरोना भाईरसको प्रभाव कम गर्न र सुरक्षित रहन भिडभाड हुने कुनैपनी कार्यक्रम नगर्न जिल्ला प्रशासन कार्यालय पाल्पाले सबै नागरिक तथा संघसंस्थाहरुलाई अनुरोध गरेको हो ।
प्रशासन कार्यालयले विश्व स्वास्थ्य संगठनका अनुसार अहिले सम्म विश्वमा ९१ हजार व्यक्तिमा कोरोनाको संक्रमण भएको र ३ हजार भन्दा धेरैको ज्यान गईसकेको भन्दै सबैलाई सचेत रहन अनुरोध गरेको हो ।
कार्यालयले सुचना जारी गर्दै विभिन्न संघ संस्थालाई संक्रमण रोक्नका लागी जनचेतना मुलक सन्देश फैलाउन अनुरोध समेत गरेको छ । सुचनामा नागरिकहरुलाई आफ्नो स्वास्थ्यमा ख्याल गर्न, भिडभाडमा नजान, कुनै पनी समस्या देखिएमा स्वास्थ्य संस्थामा जान अनुरोध गरिएको छ ।
त्यस्तै रैनादेवी छहरा गाउँपालिकाले समेत गाउँपालिका भित्र कुनैपनी सार्वजनिक कार्यक्रम नगर्न अनुरोध गरेको छ । गाउँपालिका भित्र भिडभाड हुने कुनैपनी मेला, महोत्सव तथा सर्वजनिक कार्यक्रम नगर्न अनुरोध गरेको हो ।
गाउँपालिकाले भोली हुने सार्वजनिक सुनुवाई कार्यक्रम समेत अर्को सुचना नगर्दा सम्मको लागी स्थगन गरिएको जनाएको छ ।