तानसेन। पाल्पा जिल्ला सदरमुकाम तानसेनमा नयाँ हरियाली बसपार्क निर्माण कार्य सुरू भएकाे छ ।
तानसेन नगरपालिका वडा नं ५ मा रहेको बनदेवी क्षेत्रमा बसपार्क निर्माण गर्न सल्लाका रूख कटान गरिएकाे छ । नेपाल सरकारले तानसेन नगरपालिकालाई वनदेवी सामुदायिक वनको १०० रोपनी क्षेत्रफल जमिनको स्वामित्व हस्तान्तरण गरेपछि बसपार्क निर्माण अगाडि बढेको हो । रुख कटान र व्यवस्थापनको काम अन्तिम चरणमा पुगेको छ ।
चालू आर्थिक वर्षमा सडकमा छरिएर रहेका सवारी साधनलाई पार्किङ गर्न मिल्ने गरी बसपार्क निर्माणलाई तीव्रता दिने नगर प्रमुख अशोककुमार शाहीले बताउनुभयो । बसपार्कको समस्यालाई समाधान गर्न दीर्घकालीनरूपमा व्यवस्थित तरिकाले निर्माण गरी यसै वर्षमा सम्पन्न गर्ने उहाँले जानकारी दिनुभयो ।
बजार प्रवेश क्षेत्रमा रहेकाे बसपार्क साँघुराे र पार्किङ गर्न नमिल्ने भएपछि नगरपालिकाले ठूलाे बसपार्क निर्माणकाे कार्यक्रम ल्याएकाे हाे । नयाँ बसपार्क वातावरणमैत्री, धेरै सवारी साधन राख्न मिल्ने र हरियाली हुने नगरपालिकाको वातावरण तथा सरसफाइ शाखा प्रमुख शङ्कर भण्डारी बताउनुहुन्छ । नयाँ बसपार्क बन्ने भएपछि ट्राफिक व्यवस्थापनमा सहज हुने जिल्ला ट्राफिक प्रहरी कार्यालयका प्रमुख पृथ्वीनारायण काफ्ले बताउनुहुन्छ ।
हरियाली बसपार्कमा ५०० सवारी साधन अट्ने क्षमता, पेट्रोलपम्प, ग्यारेज, उद्योग, यातायात मजदुरको सुविधाका लागि होटलसहित सुविधासम्पन्न बसपार्क निर्माण गरिने नगरपालिकाले जनाएको छ ।
