दाेभान। पाल्पा जिल्लाको तिनाउ गाउँपालिका वडा नं. ३ दोभानमा पर्ने सिद्धबाबा मन्दिरको छेउमै रहेको खोल्सामा आएको पहिराले मन्दिर परिसरमा क्षति पुराएको छ ।
आज विहान पौने एक बजे र दुई बजे गरी दुई पटक आएको पहिरोसहितको ग्रेगानले धर्मशालामा रहेको स्टोर रुम, भान्सा, धारा, प्रचार बोर्ड, खोल्सामा लगाइएको फलामको रेलिङ्ग र श्राद्ध स्थलमा क्षति पुराएको सिद्धबाबा मन्दिर विकास समितिका अध्यक्ष दलबहादुर गुरुङले बताउनुभयो । अबिरल वर्षाको कारण मन्दिर परिसरमा रहेका उल्लेखित भौतिक सामग्रीहरुको क्षति भए तापनि मानवीय क्षति भएको छैन । मन्दिर परिसरमा रहेका लक्ष्मीपति सापकोटा, बिमल पौडेल, कृष्ण न्यौपाने, फूलप्रसाद व्यवसायी गोरखनाथका चारजना सकुशल रहेको गुरुङले जानकारी दिनुभयो ।
२०३८ सालपछिको ठूलो वर्षा र क्षति भएको मन्दिरका पुजारी लक्ष्मीपति सापकोटाले बताउनुभयो । विहानैदेखि मन्दिर परिसरमा जम्मा भएको गेग्रान र लेदो हटाउन डिभिजन सडक कार्यालय, पाल्पा र बुटवलसँग समन्वय गर्दै आवश्यक डोजर लगायतका साधनको माग गरेर पहिरो पन्छाउने काम भएको छ । पहिरोले ल्याएका गेग्रान र लेदो समयमै हटाउन सकिएन भने धर्मशाला पुरै जोखिममा पर्ने देखिएको छ ।
