तानसेन । पाल्पा अस्पताल अनिश्चितकालका लागि लागि बन्द गरिएको छ ।

पाल्पा अस्पतालमा कार्यरत ४ जना स्वास्थ्यकर्मी तथा कर्मचारीमा कोरोना भाइरस संक्रमण पुष्टि भएपछि अस्पतालले आकस्मिक सेवा बाहेक अन्य सबै सेवा बन्द गरेको हो । आकस्मिक सेवा लिन आउने विरामीको स्वास्थ्यजाँच भने हुने अस्पतालले जनाएको छ । अस्पतालका निमिक्त प्रमुख डा. जगदीश कुवँरका अनुसार चिकित्सकसहित कार्यालय सहयोगी र सुरक्षाकर्मीमा कोरोना संक्रमण पुष्टि भएको जोखिम न्यूनिकरणका लागि सेवा बन्द गरिएको बताउनुभयो ।

पाल्पा अस्पतालले असोज २७ गते स्वास्थ्यकर्मी, कर्मचारी, बिरामीसहित ९ जनाको पीसीआर परीक्षणका लागि स्वाव संकलन गरी पठाइएको थियो । पीसीआर रिपोर्टमा ७ जनामा कोरोना संक्रमण देखिएको छ । संक्रमित ७ मध्ये ४ जना अस्पतालका कर्मचारी र अन्य ३ जना उपचारका लागि आएका बिरामी रहेको स्वास्थ्य कार्यालय पाल्पाका सूचना अधिकारी ओमप्रकाश पन्थीले बताउनुभयो ।

संक्रमण देखिएपछि सेवाग्राहीमा पर्न सक्ने जोखिमलाई मध्येनजर गर्दै गरिएको सेवा बन्दले केही दिन बिरामीमा पर्न जाने असुविधाप्रति अस्पताल क्षमाप्रार्थी छ, अस्पतालका अध्यक्ष नेत्रप्रसाद पाण्डेले बताउनुभयो । चाडबाड नजिकिदैँ जाँदा पाल्पामा कोरोना संक्रमणको दर बढ्न थालेको छ ।

गजेन्द्र पन्थी,
झडेवा । माथागढी गाउँपालिकामा मुख्यमन्त्री ग्रामीण विकास कार्यक्रमको आर्थिक वर्ष २०७६।२०७७ को वार्षिक समिक्षा कार्यक्रम सम्पन्न भएको छ । लुम्बिनी प्रदेशसभाका सदस्य नारायणप्रसाद आचार्यले आचार्यले गत बर्ष सम्पन्न भएका कार्यक्रमहरुको उपलब्धीलाई समीक्षा गरी आगामी वर्ष प्रभावकारी बनाउन अनुरोध गर्नुभयो । उहाँले यस बर्षको कार्यक्रम रोजगारीका कार्यक्रमहरु थपेर कृषिलाई प्राथमिकतामा पार्नुपर्ने बताउनुभयो ।

कार्यक्रममा गाउपालिकाका अध्यक्ष सन्तोषकुमार थापाले यस वर्ष कार्यविधि परिवर्तन भई आएकाले त्यसैका आधारमा गरिब र विपन्न लक्षित कार्यक्रमहरुलाई प्राथमिकता दिइ रोजगार उन्मुख कार्यक्रम अघि ल्याइने बताउनुभयो । कार्यक्रममा कार्यक्रम सहजकर्ता नारायण बहादुर कुमालले बार्षिक प्रतिबेदन प्रस्तुत गर्दै गत बर्षको कुल ५२ लाख मध्य पूँजीगत तर्फ १२ लाखको ४ ओटा कार्यक्रम र चालु तर्फको रु ३८ लाखको ६ ओटा कार्यक्रम सम्पन्न भएको बताउनुभयो । गत बर्ष सम्पन्न कार्यक्रमहरुमा शिक्षा, राहत तथा पुन स्थापना, आयआर्जन, स्वास्थ्य, कृषि र खानेपानीलगायतका कार्यक्रमहरु रहेका थिए ।

गाउँपालिकाका उपाध्यक्ष निर्मला भट्टराइले यस बर्षको कार्यक्रम प्रभावकारी रहेको बताउदै धामिगाको धनिया खेतीबाट किसानहरुले बढी फाइदा लिएको बताउनुभयो । प्रमुख प्रशासकीय अधिकृत राजु नेपालले यस बर्ष बैदेशिक रोजगार बाट आएकाहरु र कोरोनाको प्रभावले रोजगार गुमाएकाहरुलाई प्राथमिकतामा राखेर योजना बनाउन सकिने बताउनुभयो । यस कार्यक्रमलाई चालु वर्षमा ६० लाख रुपैयाँ बिनियोजन गरिएको छ ।

समीक्षा कार्यक्रममा विषयगत शाखाका प्रमुखहरु, सिफारिस समितिका सदस्यहरुको सहभागिता रहेको थियो । कार्यक्रम गाउँपालिकाका अध्यक्ष सन्तोष कुमार थापाको अध्यक्षतामा चलेको थियो ।

तानसेन । पाल्पामा लकडाउन खुलेपछि सबैभन्दा बढी कोरोना संक्रमितहरु थपिएका छन् ।  ३६ जनामा संक्रमण देखिएकोमा

स्वास्थ्य कार्यालय पाल्पाका अनुसार आज शनिवार ७५ जनामा कोरोना संक्रमण देखिएको जनाएकाे छ । स्वास्थ्य कार्यालय पाल्पाका सूचना अधिकारी ओम प्रकाश पन्थीका अनुसार निस्दी र रम्भा बाहेकका ८ वटा स्थानीय तहका ७५ जनामा काेराेना संक्रमण देखिएकाे हाे । आज ७५ जना कोरोना संक्रमित थपिएसँगै पाल्पामा कुल संक्रमितको संख्या ९ सय ६९ पुगेको छ ।

माथागढी गाउँपालिकामा २, रामपुर नगरपालिकामा २०, पूर्वखोला गाउँपालिकामा ९, रैनादेवी छहरा गाउँपालिकामा २, बगनासकाली गाउँपालिकामा १९, तिनाउ गाउँपालिकामा २, रिब्दीकोट गाउँपालिकामा १, तानसेन नगरपालिकामा १८ र अस्पतालमा २ गरी ७५ जनामा एकैपटक कोरोना देखिएको छ ।

पाल्पामा अहिलेसम्म ४ जनाको कोरोनाको कारण निधन भएको छ भने ७ सय १० जना निको भएर घर फिर्ता भएका छन् । पाल्पामा अहिले कुल सक्रिय संक्रमितको संख्या २ सय १५ पुगेको छ ।

पाल्पा । रम्भा गाउँपालिकाकाे केन्द्र पीपलडाँडामा प्रहरी चाैकी स्थापना भएकाे छ । नेपाल प्रहरी लुम्बिनी प्रदेश कार्यालयका प्रवक्ता एवम् प्रहरी वरिष्ठ उपरीक्षक राजकुमार बैदवार र रम्भा गाउँपालिकाका अध्यक्ष विष्णु प्रसाद भण्डारीले प्रहरी चाैकीकाे उद्घाटन गर्नुभयाे । रम्भा ३ अँगाहाखाेला अमराइमा चाैकी रहेकाे छ ।

उद्घाटन कार्यक्रममा प्रहरी वरिष्ठ उपरीक्षक बैदवारले चाडवाडको समयमा शान्ति सुरक्षामा विशेष ध्यान दिन प्रहरी अधिकृत तथा जवानहरूलाई निर्देशन दिनुभयाे। उहाँले प्रहरीले जनताको धनजनको सुरक्षा, अपराध नियन्त्रण र अनुसन्धानमा व्यावसायिक दक्षता देखाउनुपर्ने बताउनुभयो । पीपलडाँडा प्रहरी चाैकीमा १५ जनाको दरबन्दी रहेपनि तत्कालका लागी चौकीमा असइको कमाण्डमा १० जनाको जनशक्ति रहनेछ । चौकी स्थापनापछि रम्भा गाउँपालिकाको ताँहु, रम्भापानी, फोक्सिङकोट, झकेदी, खोकखोलाका जनताले सेवा पाउने छन् ।

गाउँपालिका अध्यक्ष बिष्णु भण्डारीले चौकी स्थापनाले गाउँपालिका भित्रकाे सुरक्षाा प्रबन्ध र स्थानीय जनताको शान्ति सुरक्षामा टेवा पुग्ने बताउनुभयो । गाउँपालिकाको पहलमा नै चौकी स्थापना भएको बताउँदै अध्यक्ष भण्डारीले जनता र स्थानीय सरकार प्रहरीको सधै साथमा रहने धारणा राख्नुभयो ।

कार्यक्रममा पाल्पाका प्रहरी प्रमुख एसपी सन्तोष कुमार भट्टराई, स्थानिय राजनितिक दलका प्रतिनिधि लगायतको उपस्थिति थियो ।

काठमाडाैँ। नवनियुक्त मन्त्रीहरुले सपथ लिनुभएको छ ।

अर्थमन्त्री विष्णुप्रसाद पौडेल, महिला बालबालिका तथा जेष्ठ नागरिक मन्त्री लीलानाथ श्रेष्ठ र सहरी विकास मन्त्री कृष्णगोपाल श्रेष्ठले राष्ट्रपति भवन शीतल निवासमा सपथ लिनुभएको हो ।

प्रधानमन्त्री केपी शर्मा ओली हिजो मन्त्रिमण्डल पुनर्गठन गर्दै हिजो थप तीन जनालाई मन्त्रीमा सिफारिश गर्नुभएकाे हाे । उपप्रधान तथा रक्षा मन्त्रालयको जिम्मेवारीमा रहेका ईश्वर पोखरेललाई प्रधानमन्त्री तथा मन्त्रिपरिषद्को कार्यालयमा राख्नुभएको छ । महिला बालबालिका तथा जेष्ठ नागरिक मन्त्रालयको जिम्मेवारी सम्हालिरहेका पार्वत गुरुङलाई सञ्चार, सूचना तथा प्रविधि मन्त्रालयको जिम्मेवारी दिनुभएको छ ।

प्रधानमन्त्रीको सिफारिसमा राष्ट्रपतिले  मन्त्री नियुक्त गर्नुभएकाे थियाे । 

पाल्पा । जिल्लासदरमुकाम तानसेन बजारमा व्यापारीले उपभाेक्तामाथि चरम लापरबाही गरेको पाइएको छ।

घरेलु तथा साना उद्योग कार्यालय पाल्पाले तानसेन बजारमा छड्के अनुगमन गर्दा  अनुगममन टाेलीलले खुलेआम उपभोक्ता ठगिएकाे निश्कर्ष निकालेका हुन्‌।बजार अनुगमन गर्दा वर्षौंअघि म्याद सकिएका सामग्री बिक्री गरेर व्यापारीहरूले उपभोक्तालाई ठगेको खुलेको छ।

बसपार्कमा रहेको होटल डायमण्डले एक वर्षअघि नै म्याद नाघेको बोटल वाटर (बोत्तलको पानी) बिक्री गरेको फेला परेको जिल्ला प्रशासन कार्यालय पाल्पाका प्रशासकीय अधिकृत रमा श्रेष्ठले बताउनुभयाे । बिक्री गर्नको लागि फ्रिजमा चिसो बनाएर राखिएको अवस्थामा म्याद नाघेको पिउने पानी फेला परेको छ। श्रेष्ठका अनुसार होटलमा म्याद नाघेका ब्राण्डेड चकलेट समेत बरामद गरिएको छ। एक वर्ष म्याद नाघेका ६५ रुपैयाँसम्म पर्ने चकलेट होटलमा बिक्री गर्न राखिएका थिए ।

कस्मेटिक पसलमा सात वर्ष पहिले नै म्याद नाघेका श्रृंगारका सामग्री बिक्री गरेको फेला परेको छ। तानसेनस्थित सिल्खानटोलमा रहेको एक पसलमा सन् २०१३ मा म्याद नाघिसकेका श्रृंगारका सामग्री बिक्री गरेको खुलेको हो। यहाँ वर्षौंअघी म्याद नाघेका पाउडर, अत्तर, विभिन्न प्रकारका अनुहार तथा हातमा लगाउने क्रिम फेला परेको छ। अनुगमनका क्रममा विभिन्न पेय पदार्थ, ससेज, सोंफ लगायतका सामग्री म्याद नाघेको अवस्थामा फेला परेको थियो।

करिब २५ हजार रुपैयाँ बराबरको म्याद नाघेका सामग्री जफत गरेर नष्ट गरिएको घरेलु कार्यालयका प्रमुख देवीराम भण्डारीले बताउनुभयाे। चाडपर्वको बेला उपभोक्तालाई यो वा त्यो बहानामा ठग्ने प्रवित्ति बढेकोले अनुगमनलाई तीव्र पारिएको उहाँले बताउनुभयाे । उपभोक्तालाई ठगि गरेका व्यापारीलाई कारबाहीको लागि सम्बन्धित निकायमा सिफारिस गर्ने तयारी गरेकाे छ । भण्डारीका अनुसार खाद्यान्न पसल, दुध डेरी, वधशाला, मासु पसल, फेन्सी पसल, कस्मेटिक पसल, औषधि पसल लगायतका पसलहरूमा मूल्य सूची, साइनबोर्ड, व्यवसाय दर्ता तथा नवीकरण, नापतौल, म्याद नाघेको सामग्री, यस अगाडिको निर्देशनको पालना गरे वा नगरेको बारे अनुगमन गरिएको थियो। धेरै व्यापारीले मापदण्ड पूरा गरेका छैनन्।

अनुगमनलाई कडाइका साथ निरन्तरता दिने सहायक प्रमुख जिल्ला अधिकारी दुर्गा बञ्जाडेले बताउनुभयाे। कानुन उल्लंघन गरेर लापरबाही गर्ने व्यापारीलाई कारबाही गर्ने हुन्छ। ‘पटक पटक सुझाव दिँदा समेत नसुध्रिएका व्यापारीलाई कानुन बमोजिम कारबाही हुन्छ,’ उहाँले भन्नुभयाे, ‘आफू ठगिएको महसुस भएमा तत्काल सम्बन्धित निकायमा खबर गर्नुस्।’ म्याद नाघेका सामग्री बिक्री गर्दै आएका व्यापारीलाई प्रशासनमा उपस्थित गराई आवश्यक अनुसन्धान गर्ने काम भइरहेको छ।

बुटवल । गुल्मी रिडीका समाजसेवी गणेशपुण्य श्रेष्ठले सामुदायिक रेडियो मदनपोखरालाई मुष्ठीदान गर्नुभएको छ ।

रिडीमा रहँदा सामुदायिक रेडियो मदनपोखरा सुन्नुभएका श्रेष्ठले ३ सय ६५ दिनको मुष्ठीदान स्वरुप पाँच हजार रुपैँया हस्तान्तरण गर्नुभएको हो । बुटवलमा रहनुभएका श्रेष्ठले विगतमा रेडियोले सूचना प्रवाहमार्फत् पु¥याएको योगदानको स्मरण गर्दै सामुदायिक रेडियो मदनपोखराका सञ्चालक समितिका अध्यक्ष झपेन्द्रबहादुर जिसीलाई नगद हस्तान्तरण गर्नुभयो ।

रेडियो मन लगाएर सुन्ने, सकारात्मक नकारात्मक कुरा गुन्ने र राम्रा कुरालाई दिलमा उन्ने गर्नुभएका श्रेष्ठलाई मुष्ठीदान गर्न अधुरै रहन्छ कि भन्ने पिरलो रहेको थियो । पिरलोमोचनपछि समाजसेवी श्रेष्ठले भन्नुभयो, ‘समुदायलाई सत्य तथ्य सूचना चाहिन्छ, मदनपोखराले सधैभर यस्तो काम गरिरहोस् ।’ अध्यक्ष जिसीले मुष्ठीदानका लागि आभार व्यक्त गर्दै समुदायले दिएको माया एक रुपैँया नै किन नहोस् त्यो हाम्रा लागि लाख हो भन्नुभयो । भेटमा अध्यक्ष जिसीले सारेमका प्रकाशन बाेली पत्रिका पनि श्रेष्ठलाई प्रदान गर्नुभयाे । 

सामुदायिक रेडियो मदनपोखरा सुन्नेहरुले रेडियोको दिगो विकासका लागि मुष्ठीदान र दाउरादान गर्दै आएका छन् ।

पाल्पा । प्रदेश नम्बर पाँचको राजधानी दाङको देउखुरी बनाउने प्रस्ताव प्रदेश सभामा पेश भएको छ ।

प्रदेश सरकारले आजको प्रदेशसभा बैठकमा राजधानी र नामाकरण निर्धारणसम्बन्धी कार्यविधि पेश गरेर प्रस्ताव अघि बढाउन लागेको हो । प्रदेश आन्तरिक मामिला तथा कानुनमन्त्री कुलप्रसाद केसीले प्रदेशको नाम लुम्बिनी र दाङको देउखुरीलाई राजधानी प्रस्ताव टेवल गर्नुभयो । प्रदेशसभाको बैठकमा मन्त्री केसीले भन्नुभयो, ‘दाङको राप्ती गाउँपालिका, गढवा गाउँपालिका र अर्घाखाँचीको शितगंगा नगरपालिकाले ओगटेको क्षेत्र राप्ती नदी किनार मैदानी भाग देउखुरीलाई राजधानीको रुपमा प्रस्ताव गर्दछु ।’

प्रदेशसभा बैठक अगाडि प्रदेश मन्त्रिपरिषद्को बैठकले प्रदेशको प्रस्तावित नाम लुम्बिनी र राजधानी दाङको देउखुरी बनाउने प्रस्ताव प्रदेशसभामा लैजाने निर्णय गरेको छ । प्रदेशको राजधानी बुटवल कि दाङ भन्ने विषयमा सत्तारुढ दल नेकपामा विवाद रहेको थियो । नेकपा अध्यक्ष एवम् प्रधानमन्त्री केपी शर्मा ओली र अर्का अध्यक्ष पुष्पकमल दाहालबीच सहमती भएपछि प्रदेश सरकारले राजधानी र नामांकनको विषय पेश गरेको छ । आन्तरिक मामिला तथा कानुनमन्त्री केसीले प्रदेशसभा सदस्यहरुलाई इतिहासका रचयिताको संज्ञा दिदै ऐतिहासिक गौरवको दिन, अढाई वर्षको छलफलको निष्कर्ष र प्रदेशसभाको नयाँ रुप दिने दिनका रुपमा लिएको छु भन्नुभयो । ‘अब अंक अंकित नामलाई अक्षर अंकित नामले प्रदेशको पहिचान बन्नेछ ।’ 

संविधानअनुसार स्थायी राजधानी र नामाकरणको प्रस्ताव पारित हुन दुई तिहाई मत चाहिन्छ । प्रदेशसभा ८७ सदस्यीय रहेको छ । यो प्रस्ताव प्रदेशसभाबाट पारित भएपति प्रदेशको राजधानी र नामको टुंगो लाग्नेछ । प्रदेश ५ को अस्थाई राजधानी अहिले बुटवलमा छ। देउखुरी बुटवलबाट करिव ११० किलोमिटर पश्चिम र नेपालगञ्जबाट १५५ किलोमिटर पूर्वमा अवस्थित छ ।

मुख्यमन्त्री शंकर पोखरेलले भर्जिन एरिया नै राजधानी बन्छ र सबैले खुशीयालीपूर्वक स्वागत गर्दछन् भन्दै आउनुभएको थियो । नेकपाभित्र वैचारिक नेताको पहिचान बनाउनुभएका मुख्यमन्त्री पोखरेलले भूगोलको बीच भाग र राप्ती किनारको भर्जिन एरियालाई नै प्रस्तावित गरेर बचनको पक्का भएको आफूलाई प्रमाणित गराउनुभएको छ । नेकपाले प्रदेश इन्चार्जसमेत रहनुभएका पोखरेलकाे मुख्यमन्त्री निवासमा भोलि बिहान ८ बजे पार्टी संसदीय दलको बैठक बोलाएको छ ।

पाल्पा । तानसेन नगरपालिका वडा नं ७ बाघखोरको निर्माणाधिन शीत भण्डार (कोल्ड स्टोर) को काम अलपत्र परेको छ ।

नगरपालिकाले पन्ध्र महिनामा सक्ने गरी हिमडुङ एण्ड थोकर एण्ड जय रक्तकाली जेभीलाई ठेक्का दिएको कोल्ड स्टोरको काम ८ वर्ष बित्दासमेत सम्पन्न हुन सकेको छैन । विगत तीन वर्षदेखि निर्माणको काम ठप्प छ । निर्माण भएका संरचना काम नलाग्ने अवस्थामा पुगेका छन् भने कतिपय संरचनामा थप कार्य गर्न नहुने अवस्थामा पुगेको छ । कृषि उपज भण्डारण गरी किसानलाई सहुलियत दिने उद्देश्यले महत्वका साथ अगाडि सारेको यो योजनाले पाल्पामा असफल योजनाका रुपमा चर्चा पाइरहेको छ ।

तानसेन नगरपालिकाले निर्माण व्यवसायीको कार्य सन्तोषजनक नभएकाले कारबाही प्रक्रिया अगाडि बढाउने निर्णय गरेको छ । असोज ८ गते बसेको नगर कार्यपालिकाको बैठकले अन्तिम कारबाहीका लागि कानुनी प्रक्रिया अगाडि बढाउने निर्णय गरेको प्रमुख प्रशासकीय अधिकृत डिल्लीराज बेल्बासेले बताउनुभयो । भारतीय राजदूतावासको ४ करोड ९९ लाख ९१ हजार ९ सय ५ रुपैँया आर्थिक सहयोगमा सुरु भएको कोल्ड स्टोरको ८ वर्षको अवधिमा २७ प्रतिशत मात्र प्रगति भएको देखिन्छ । बहादुरसिंह लामाको हिमडुङ एण्ड थोकर र रामप्रसाद भट्टको जय रक्तकालीले जेभीमा यो योजनाको ठेक्का लिएका हुन् ।

२०६९ फागुन २३ गते सम्झौता भएको योजना २०७१ जेठ ३० गते सम्पन्न गर्ने म्याद रहेको थियो । समयमा काम सम्पन्न नभएपछि नगरपालिकाले ३ पटक योजनाको म्याद थपेको छ । असार मसान्त यता भने सम्झौताको म्याद थपिएको छैन । नगरपालिकाले २०७५ माघ ८ गते पूर्व निर्धारित क्षतिपूर्ति वापत ४८ लाख २२ हजार ५५ रुपैँया बुझाउन व्यवसायीलाई पत्राचार गरेको र त्यसपछि काम नभएकाले कारवाहीका लागि प्रक्रिया अन्तिम अगाडि बढाउने तयारी गरेको इन्जिनियर रामप्रसाद श्रेष्ठले बताउनुभयो । सार्वजनिक खरिद ऐन अनुसार अन्तिम कारवाही भनेको कालोसूचीमा राख्ने हो ।

निर्माण व्यवसायी रामप्रसाद भट्टले आफूले काम गर्न हिमडुङ एण्ड थोकरसँग जेभी बनाएर ठेक्का लिएको र भुक्तानीमा समस्या रहने गरेकाले काममा ढिलाई भएको बताउनुभयो । भारतीय दूतावासकै पहलमा नगरपालिका र निर्माण व्यवसायी बहादुरसिं लामा बीच नगरपालिकाले जरिमाना नलगाउने र निर्माण व्यवसायीले मूल्य वृद्धि नखोज्ने सहमति भएको भट्टको भनाई छ । निर्माण व्यवसायी भट्टले कामको मूल्यांकन गरी ५० लाख रुपैँया आफूहरुले भुक्तानी नपाएको दावी गर्नुभयो । नगरपालिकाले निर्माण कम्पनीलाई हालसम्म २ करोड १६ लाख रुपैँया भुक्तानी दिएको छ ।

नगरपालिकाले निर्धारित रकमको क्षतिपूर्ति तिर्न पत्राचार गर्ने र बीचमा कार्यान्वयन नगर्दा निर्माण व्यवसायीले सरकारलाई नटेरेको सरोकारवालाहरु बताउँछन् । निर्माण व्यवसायीलाई नगरपालिकाले कालोसूचीमा राख्ने भन्न थालेको पनि २ वर्ष बितिसक्यो । निर्माण व्यवसायीले आलटाल गर्दा गर्दै कोल्ड स्टोर नबन्ने अवस्था आएपछि यस क्षेत्रका किसानहरु निराश भएका छन् ।

नगरपालिकाका प्रमुख अशोककुमार शाहीले निर्माण व्यवसायीको कमजोरीका कारण सिंगो नगरपालिकाको विकास योजना प्रभावित हुने गरेको बताउनुभयो । प्रमुख शाहीले काममा ढिलासुस्ती र लापरवाही गर्ने निर्माण व्यवसायीको सूची तयार गरी निर्माण कार्यमा सहभागी नगराउने निर्णय गरेको बताउनुभयो । नगरपालिकाभित्र निर्माण व्यवसायीबाट भएका अनगिन्ती समस्याका कारण स्थानीयस्तरबाटै सार्वजनिक खरिद नियमावली जारी गरी काम नगर्ने निर्माण व्यवसायीलाई कालोसूचीमा राख्ने प्रबन्ध गर्न कार्यपालिकाले सुझाव दिएकाे छ । 

पाल्पा र आसपासका क्षेत्रमा उत्पादन भएका तरकारी, फलफूल, अदुवा, दूधलगायतका कृषि उत्पादनलाई चिस्यान केन्द्रमा भण्डारण गर्न यसको आवश्यकता महशुस गरिएको थियो । उत्पादित समयमा बजारमा खपत हुन नसकेको वस्तु र कृषि उपजको मूल्यका कारण किसानलाई हुने नोक्सानीबाट जोगाउन यो दुई हजार टन क्षमताको कोल्ड स्टोरको निर्माण सुरु गरिएको हो ।